பெங்களூரு, கோரமங்களா சொன்னேனஹள்ளியை சேர்ந்தவர் தர்ஷன், 23. கடந்த 12ம் தேதி தன் வீட்டின் அருகில் குடிபோதையில் கையில் கத்தியுடன் தகராறில் ஈடுபட்டதாக கூறப்படுகிறது. விவேக் நகர் போலீசார் அங்கு சென்று, அவரை பிடிக்க முயற்சித்தபோது, போலீசாரை தாக்கி உள்ளார். அவரை சுற்றி வளைத்து பிடித்த போலீசார், போலீஸ் நிலையத்துக்கு அழைத்துச் சென்றனர்.

உடனே போலீஸ் நிலையத்துக்கு சென்ற அவரது குடும்பத்தினர், 'குடிபோதையில் இவ்வாறு நடந்து கொண்டதால் வழக்குப் பதிவு செய்ய வேண்டாம்' என்று கேட்டுக் கொண்டனர். இதனால் போலீசார் வழக்குப் பதியவில்லை என கூறப்படுகிறது. இதன் பின், அவரை மாதநாயக்கனஹள்ளியில் உள்ள யூனிட்டி சோஷியல் சர்வீஸ் டிரஸ்ட் மறுவாழ்வு மையத்தில் போலீசார் சேர்த்துள்ளனர். அங்கு அவர், எட்டு நாட்கள் சிகிச்சை பெற்று வந்தார்.

கடந்த 26ம் தேதி தர்ஷனுக்கு மூச்சு விடுவதில் சிரமம் ஏற்பட்டது. இது தொடர்பாக, போலீசாருக்கும், தர்ஷனின் தாய் ஆதிலட்சுமிக்கும் மறுவாழ்வு மையத்தினர் தகவல் தெரிவித்தனர்.

மையத்திற்கு சென்று தாய் விசாரித்தபோது, தர்ஷனை, மருத்துவமனைக்கு அழைத்துச் சென்றிருப்பதாக தெரிவித்தனர்.

அங்கு சென்று விசாரித்தபோது, தர்ஷன் இறந்துவிட்டதாக டாக்டர்கள் தெரிவித்தனர். அதிர்ச்சியடைந்த ஆதிலட்சுமி, மாதநாயக்கனஹள்ளி போலீசில் புகார் அளித்தார்.

இது தொடர்பாக அவர் கூறியதாவது:

போலீஸ் நிலையத்தில் என் மகனை போலீசார் கடுமையாக தாக்கி உள்ளனர். இதனால் நடக்க முடியாமல் சிரமப்பட்ட அவரை, மறுவாழ்வு மையத்திற்கு அனுப்பி வைத்துள்ளனர். அங்கிருந்தவர்கள், என் மகனை பார்க்கவும், போனில் பேசவும் அனுமதிக்கவில்லை.

ஆனால், என் மகன் நலமாக உள்ளார். கவலைப்பட வேண்டாம் என்றனர். ஆனால், 26ம் தேதி என்னை தொடர்பு கொண்ட மையத்தினர், என் மகன் மூச்சு விடுவதில் சிரமப்படுகிறார் என்றனர்.

நானும் மையத்துக்கு சென்றபோது, மகனை நெலமங்களாவில் உள்ள அரசு மருத்துவமனைக்கு அழைத்து சென்றிருப்பதாக தெரிவித்தனர்.

அங்கு சென்று விசாரித்த போது, மகன் இறந்துவிட்டதாக டாக்டர்கள் தெரிவித்தனர். மகனின் மார்பு, பின்புறம், கை, கால்களில் காயங்கள் இருந்தன.

இவ்வாறு அவர் கூறினார்.

பெங்களூரு ரூரல் எஸ்.பி., பாபா கூறுகையில், ''மாதநாயகனஹள்ளி போலீசார், விவேக் நகர் போலீஸ் நிலையத்தின் இன்ஸ்பெக்டர், உட்பட நான்கு போலீசார் மற்றும் மறுவாழ்வு மையத்தின் உறுப்பினர்கள் மீதும் வழக்குப் பதிவு செய்யப்பட்டுள்ளது,'' என்றார்.

தற்போது, இவ்வழக்கை சி.ஐ.டி.,க்கு மாற்றி, மாநில டி.ஜி.பி., சலீம் உத்தரவிட்டுள்ளார். சி.ஐ.டி., போலீசார் விசாரித்து வருகின்றனர்.