நாட்டின் பல பகுதிகளில் தெரு நாய்கள் தாக்குதலில் சிறு குழந்தைகள் முதல் பெரியவர்கள் வரை இறந்துள்ளனர்.

இதுதொடர்பாக உச்ச நீதிமன்றத்தில் நடந்த விசாரணையில், 'சங்கங்கள், அரசு, தனியார் பள்ளி, கல்லுாரிகள் அருகில் சுற்றித்திரியும் தெருநாய்கள் பற்றியும், அவற்றை இடமாற்றம் செய்யப்பட்டது, தங்கும் இடம் கட்டப்பட்டது குறித்து எட்டு வாரத்தில் அறிக்கை சமர்ப்பிக்க வேண்டும்' என்று உத்தரவிட்டிருந்தது.

இதையடுத்து, ஜி.பி.ஏ., எனும் கிரேட்டர் பெங்களூரு ஆணையம், அரசு, தனியார் பள்ளிகள், கல்லுாரிகள், பல்கலைக்கழகங்கள், பயிற்சி மையங்கள், அரசு, தனியார் மருத்துவமனைகள், சுகாதார மையங்கள், ஆரம்ப சுகாதார மையங்கள், மாவட்ட மருத்துவமனைகள், மருத்துவ கல்லுாரிகள், விளையாட்டு காம்பிளக்ஸ்கள், தனியார், அரசு மைதானங்கள், பஸ் நிலையங்கள், டிப்போக்கள், பஸ் முனையங்கள், ரயில் நிலையங்கள், மற்ற துறை அலுவலகங்களுக்கு நோட்டீஸ் அனுப்பி உள்ளது.

நோட்டீசில் கூறப்பட்டு உள்ளதாவது:

 தெரு நாய்களின் எண்ணிக்கை தெரிவிக்க வேண்டும்

 நிறுவன வளாகத்திற்குள் நாய்கள் நுழைவதை தடுக்க தடுப்புகள் அமைப்பது முக்கியம்

 நிறுவன வளாகத்துக்குள் கழிவு மேலாண்மை, துாய்மை பராமரித்தல், மாநகராட்சியுடன் ஒருங்கிணைப்பு ஆகியவற்றுக்கு பொறுப்பான அதிகாரி நியமித்தல்

 நிறுவன வளாகத்தில், நோடல் அதிகாரி பெயர், மொபைல் போன் எண் இடம் பெற்றிருக்க வேண்டும். அவர், சம்பந்தப்பட்ட மாநகராட்சிக்கு தகவல் தெரிவிக்க வேண்டும்

 விளையாட்டு வளாகங்கள், வளாகங்களை கண்காணிக்க 24 மணி நேர கண்காணிக்க, பாதுகாப்பு பணியாளர்களை நியமனம்

 மாநகராட்சிக்கு உட்பட்ட கால்நடை துறை அதிகாரிகள், நாய்களுக்கு உணவளிக்கும் இடத்தை கண்டறிய வேண்டும். நாய்களுக்கு இந்த இடத்தை தவிர, வேறு இடங்களில் உணவளிக்க தடை விதிக்க வேண்டும். விதிகளை மீறினால், உச்ச நீதிமன்ற உத்தரவுபடி நடவடிக்கை எடுக்க வேண்டும்

 இந்திய விலங்குகள் நல வாரியம் வழிகாட்டுதல்கள், ஏ.பி.சி., விதிகளின்படி, பொது மக்கள், தெரு நாய்களை தத்தெடுத்து, அவற்றுக்கு உணவு, சுகாதாரம், பாதுகாப்பு, பாதுகாப்பான தங்குமிடம் வழங்குவதால் பிரச்னையை தீர்க்க உதவும்

 தெரு நாய்களை தத்தெடுக்க, ஐந்து மாநகராட்சியின் கால்நடை பராமரிப்பு துறை அதிகாரிகளை தொடர்பு கொள்ளலாம்

 தெரு நாய்கள் கடித்தல் தொடர்பான புகார்களுக்கு 1533 என்ற எண்ணுக்கும்; வெறிநாய்கள் கடித்தால் 63648 93322 என்ற மொபைல் எண்ணில் தெரிவிக்கலாம்.

இவ்வாறு அதில் குறிப்பிட்டுள்ளது.