ஷிவமொக்காவின், ஹொசநகரின், ஹுலிகல் கிராமத்தில் குன்ச்சிகல் நீர் வீழ்ச்சி உள்ளது. இது இந்தியாவின், மிக உயரமான நீர் வீழ்ச்சிகளில் ஒன்றாகும். 1,493 அடி உயரத்தில் இருந்து பாய்கிறது. 100 அடி அகலம் கொண்டது.

வராஹி ஆற்றில் இருந்து உருவாகும் இந்த நீர் வீழ்ச்சி, நீர் மின் உற்பத்திக்கு பயன்படுகிறது.

பொதுவாக மழைக்காலத்தில் நீர் வீழ்ச்சிகளை காண்பது, அற்புதமான காட்சியாக இருக்கும். மனதை கொள்ளை கொள்ளும். இதை பார்க்கும் போது, அமெரிக்காவின் நயாகரா நீர் வீழ்ச்சியை கண்ட அனுபவம் ஏற்படும்.

குன்ச்சிகல் நீர் வீழ்ச்சி பூலோக சொர்க்கமாகு ம். தானே வழி வகுத்து கொண்டு, நீர் பாய்ந்து செல்லும் அழகை ரசிக்க, இரண்டு கண்கள் போதாது. நகரங்களில் இயந்திரத்தனமான வாழ்க்கையால் சலிப்படைந்துள்ளவர்களுக்கு, குன்ச்சி நீர் வீழ்ச்சி சிறந்த இடமாகும் .

சுற்றிலும் இயற்கை எழில் மிகுந்த வனப்பகுதியில், இந்த நீர் வீழ்ச்சி அமைந்துள்ளது. சிறிது நேரம் இங்கு பொழுது போக்கினால், மனம் அமைதி அடையும். இதே காரணத்தால், பெருமளவில் சுற்றுலா பயணியர் வருகின்றனர். வார இறுதி நாட்கள், விடுமுறை நாட்களில் இளைஞர்கள், இளம் பெண்கள், மாணவர்கள் அதிகம் வருகின்றனர்.

மலையேற்றம் செய்வோரும் அதிகம். குன்ச்சிகல் நீர் வீழ்ச்சியை ரசிக்க விரும்பினால், வனப்பகுதி பாதையில் செல்ல வேண்டும்.

இயற்கையை ரசித்தபடி நடப்பது, இனிமையான அனுபவத்தை கொடுக்கும். நீர் வீழ்ச்சியின் சுற்றுப்பகுதிகளில் பல்வேறு பறவைகள், விலங்குகள், அபூர்வமான தாவரங்களை காணலாம். போட்டோகிராபியில் ஆர்வம் உள்ளவர்களுக்கு தகுந்த இடம்.

போட்டோ ஷூட், வீடியோ எடுக்கலாம். அடர்த்தியான வனப்பகுதி என்பதால், வழிகாட்டியை உடன் அழைத்து செல்வது நல்லது.

இங்கு கேம்பிங் செய்யவும் அனுமதி உள்ளது. நீர் வீழ்ச்சி அருகிலோ அல்லது வனத்திலோ டென்ட் போட்டு, ஒரு இரவை கழிக்கலாம். ஆனால் இதற்கு வனத்துறையின் அனுமதி பெறுவது கட்டாயம்.

- நமது நிருபர் -