பெங்களூரின் கெம்பாபுராவில் இருந்து ஜே.பி.நகர் 4வது பேஸ் வரை 32.15 கி.மீ., துாரத்திற்கு 15,611 கோடி ரூபாய் செலவில், மெட்ரோ ரயில் பாதை அமைக்கப்பட உள்ளது.

இந்த பணிகளுக்காக 11,000 மரங்கள் வெட்டப்படும் என, பெங்களூரு மெட்ரோ ரயில் நிர்வாகம் முதலில் அறிவித்தது. இதற்கு சுற்றுச்சூழல் ஆர்வலர்களிடம் இருந்து கடும் எதிர்ப்பு கிளம்பியது. இதனால் 6,500 மரங்களை வெட்ட முடிவு செய்யப்பட்டது. இதற்கும் சுற்றுச்சூழல் ஆர்வலர்கள் உடன்படவில்லை.

இதையடுத்து 2,183 மரங்களை வெட்ட, மெட்ரோ நிர்வாகம் தயாரானது.

இதற்கு ஜி.பி.ஏ.,வின் வனத்துறையிடம் அனுமதி கேட்டது. முதல்கட்டமாக 1,092 மரங்களை வெட்ட ஜி.பி.ஏ.,விடம் இருந்து அனுமதி கிடைத்துள்ளது. இந்த மரங்களை வெட்ட சுற்றுச்சூழல் ஆர்வலர்கள் மீண்டும் எதிர்ப்பு தெரிவித்துள்ளனர்.

இதுகுறித்து சுற்றுச் சூழல் ஆர்வலரான அருண் கூறியதாவது:

மெட்ரோ பணிக்காக ஒரு மரத்தை வெட்டினால், அதற்கு பதிலாக 10 மரக்கன்றுகளை கொடுக்க வேண்டும். 1,000 மரங்களை வெட்டும்போது 10,000 மரக்கன்றுகளை மெட்ரோ அதிகாரிகள் எங்கு சென்று நடுவர்? இதற்கு முன்பு மெட்ரோ பணிக்காக வெட்டப்பட்ட மரங்களுக்கு பதிலாக, எங்கெங்கு மரக்கன்றுகள் நட்டனர் என்று முதலில் கூற வேண்டும்.

இவ்வாறு அவர் கூறினார்.