குடகு மாவட்டம், மடிகேரி தாலுகாவின் பிராமணர் வீதியில் மடிகேரி நகராட்சி துப்புரவு தொழிலாளர்கள், நேற்று காலையில் குப்பை சேகரிப்பதில் ஈடுபட்டிருந்தனர். அப்பகுதியில் வசிக்கும் ஓய்வுபெற்ற அரசு அதிகாரி சீனிவாஸ், குப்பை போட வந்தார்.

பிளாஸ்டிக் கழிவுகளையும் சேர்த்து, குப்பை வாகனத்தில் போட்டார். இதை பார்த்த ஓட்டுநர் ரவி, ‘பிளாஸ்டிக் கழிவை சேர்த்து வாகனத்தில் போட வேண்டாம். தனித்தனியாக போடுங்கள்’ என கூறினார்.

இதனால் கோபமடைந்த சீனிவாஸ், குப்பை வாகன ஓட்டுநருடன் தகராறு செய்தார். ‘ஈர கழிவுகள், உலர்ந்த கழிவுகளை தரம் பிரிப்பது, எங்கள் வேலை அல்ல. உங்கள் வேலை. துப்புரவு தொழிலாளர்களாக பிறந்தது, உங்கள் கர்ம வினை. நாங்கள் படித்தவர்கள். குப்பையில் கை வைக்க மாட்டோம்’ என, பேசியுள்ளார்.

சீனிவாஸ் பேசியதை அங்கிருந்த சிலர், மொபைல் போனில் பதிவு செய்து, சமூகவலைதளத்தில் வெளியிட்டனர். பலரும் ஓய்வுபெற்ற அதிகாரி சீனிவாசை கண்டித்தனர். துப்புரவு தொழிலாளர்களை அவமதித்த, அவர் மீது கிரிமினல் வழக்கு பதிவு செய்யும்படி வலியுறுத்தினர்.