மாண்டியா மாவட்டம், ஸ்ரீரங்கப்பட்டணா தாலுகாவில் ஆரத்தி உக்கட அஹல்யாதேவி மாரம்மா கோவில் உள்ளது. கோவில் வீதியில் உள்ள கடைகளில் மைசூரு மற்றும் மாண்டியாவை சேர்ந்த இரு திருநங்கையர் குழுவினரும் பணம் வசூலித்து வந்தனர். இங்கு யார் பணம் வசூலிப்பது என்பதில் இரு குழுவினருக்கும் இடையே நீண்ட நாட்களாக பிரச்னை இருந்து வருகிறது.

நேற்று காலையில் கோவில் வீதியில் உள்ள கடைகளில் பணம் வசூலிக்க இரண்டு குழுவினரும் ஒரே நேரத்தில் வந்தனர். அப்போது, யார் பணம் வசூலிப்பது என்பதில் வாய் தகராறு ஏற்பட்டது. இது அடிதடியாக மாறியது. இரு குழுவினரும் குச்சி, கற்கள் என கையில் கிடைத்ததை வைத்து பரஸ்பரம் தாக்கிக் கொண்டனர்.

ஆடைகளை கிழித்து, தலை முடியை பிடித்து இழுத்து கொடூர தாக்குதலில் ஈடுபட்டனர். கோவில் வீதியில் பரபரப்பை ஏற்படுத்தியது. அங்கிருந்தவர்கள் சிலர் சண்டையை தடுக்க முயன்றனர். பின் அனைவரும் கலைந்து சென்றனர்.

இது குறித்த வீடியோவை அங்கிருந்த நபர், தன் மொபைல் போனில் பதிவு செய்து, சமூகவலைதளங்களில் வெளியிட்டார். ஸ்ரீரங்கப்பட்டணா ரூரல் போலீசார் விசாரித்து வருகின்றனர்.