உலோகம், ரசாயனம், காகிதம், உணவு, ஜவுளி உள்ளிட்ட எட்டு பிரிவுகளைச் சேர்ந்த, 400 நிறுவனங்களின் ஒவ்வொரு மாத தயாரிப்பு நிலவரம் குறித்து எச்.எஸ்.பி.சி., வங்கி ஆய்வு நடத்தி, தயாரிப்பு துறை உற்பத்தி வளர்ச்சி அடிப்படையிலான பி.எம்.ஐ., குறியீடு குறித்து அறிக்கை வெளியிட்டு வருகிறது.

'எஸ் அண்டு பி., குளோபல் இந்தியா' எனும் நிறுவனம், இதற்கான தரவுகளை திரட்டி வருகிறது.

இந்த அறிக்கையில் தெரிவிக்கப்பட்டு உள்ளதாவது:

தயாரிப்பு துறையின் உற்பத்தி வளர்ச்சி அடிப்படையிலான பி.எம்.ஐ., குறியீடு, கடந்த ஜூனில் 58.30 புள்ளிகளாக இருந்த நிலையில், ஜூலையில் 58.10 புள்ளிகளாக குறைந்துவிட்டது.

இக்குறியீடு, 50 புள்ளிகளுக்கு அதிகமாக இருந்தால், அது வளர்ச்சியை குறிக்கும்; குறைவாக இருந்தால், சரிவை குறிக்கும். இந்த வகையில் ஜூலையிலும் வளர்ச்சியே காணப்பட்டுள்ளது.

கடந்த மாதம், நிறுவனங்களின் உற்பத்தி மற்றும் புதிய ஆர்டர்கள், மிதமான உயர்வையே கண்டன.

உள்ளீட்டு பொருட்களின் விலை அழுத்தங்கள் மற்றும் வலுவான தேவை காரணமாக, கடந்த 11 ஆண்டுகளில் இல்லாத வகையில் விற்பனை விலை அதிகரித்தது.

இவ்வாறு தெரிவிக்கப் பட்டுள்ளது.