சி.ஐ.ஐ., எனப்படும் இந்திய தொழில் கூட்டமைப்பு, தமிழக அரசின் வழிகாட்டி நிறுவனம், ஐக்கிய அரபு அமீரகம் ஆகியவற்றின் சார்பில், 'இன்வெஸ்டோபியா' என்ற பெயரில் கருத்தரங்கம் மற்றும் முதலீட்டாளர்கள் சந்திப்பு நிகழ்ச்சி, சென்னையில் நேற்று நடந்தது.

அதிக கவனம்

நிகழ்ச்சியில் பங்கேற்று, ஐக்கிய அரபு அமைச்சர் அப்துல்லா பின் தக் அல்மாரி பேசியதாவது:

இந்தியா, ஐக்கிய அரபு அமீரகத்தின் முக்கிய நட்பு நாடு. இந்தியாவின் மூன்றாவது பெரிய வர்த்தக உறவை கொண்ட நாடாக அமீரகம் உள்ளது.

முதலீடுகளை ஈர்க்க எங்கள் நாட்டில், 40 சட்டங்களில் திருத்தம் செய்யப்பட்டது. இதன் விளைவாக, 100 சதவீத அன்னிய நேரடி முதலீட்டிற்கு அனுமதி அளிக்கப்பட்டதுடன், வர்த்தகம் புரிவோருக்கு, 'தங்க விசா' வழங்கப்படுகிறது.

ஐக்கிய அரபு அமீரகமும், தமிழகமும் மக்களின் திறமையை வளர்ப்பதில் அதிக கவனம் செலுத்துகின்றன.

கடந்த 2022ல் இந்தியா - ஐக்கிய அரபு அமீரகம் இடையில் ஏற்பட்ட ஒப்பந்தம் வாயிலாக வர்த்தகம், 15 சதவீதம் வளர்ச்சி கண்டது.

இரு நாடுகளுக்கும் இடையே உள்ள சவால்களை களைய, தொழில்நுட்ப கவுன்சில் அமைக்கப்பட்டது. அக்குழுவின் ஆலோசனைபடி, வர்த்தகம் செய்வதை எளிதாக்கினோம்.

இந்தாண்டு துவக்கத்தில் பிரதமர் மோடி, ஐக்கிய அரபு நாட்டிற்கு வந்து, ஒப்பந்தம் செய்தார். இதன் விளைவாக, இந்தியாவை உள்ளடக்கிய கிழக்கு பிராந்தியத்தின் தொடர்பு பாலமாக ஐக்கிய அரபு அமீரகம் திகழ்கிறது.

அமீரகத்தில் கச்சா எண்ணெய் அல்லாத துறைகளில் வளர்ச்சி ஏற்பட்டு வருகிறது.

மொத்த உள்நாட்டு உற்பத்தியில், கச்சா எண்ணெய் அல்லாத துறைகளின் பங்கு 74 சதவீதம் உள்ளது.

அர்ப்பணிப்பு

கச்சா எண்ணெய் அல்லாத சுகாதாரம், சிறு, குறு, நடுத்தர தொழில் துறை உள்ளிட்ட துறைகளை மேம்படுத்த அதிக கவனம் செலுத்துகிறோம். இந்தியா உடன் வர்த்தக உறவுகளை மேற்கொள்ள அர்ப்பணிப்புடன் உள்ளோம்.

இவ்வாறு அவர் பேசினார்.

அப்துல்லா ஓட்டப்பந்தய ஆர்வலர் என்பதால், அவருக்கு தமிழகத்தில் உற்பத்தி செய்த 'ஷூ'வை பரிசளித்தார், தமிழக தொழில் துறை அமைச்சர் ராஜா.

அமீரக அமைச்சர் அப்துல்லாவை, சுவிட்சர்லாந்தின் டாவோசில் நடந்த பொருளாதார மாநாட்டில் சந்தித்து, 'இன்வெஸ்டோபியா' நிகழ்ச்சியை தமிழகத்தில் நடத்த வலியுறுத்தினோம். அதை ஏற்றதற்கு நன்றி.

ராஜா,

அமைச்சர், தமிழக தொழில் துறை

பொருளாதார மையமாக, ஐக்கிய அரபு அமீரகம் திகழ்கிறது. முதலீடுகளை ஈர்க்க, எளிதில் அனுமதி வழங்குவது உள்ளிட்ட பல்வேறு விஷயங்களில் உதவுகிறோம்.

அலியா அப்துல்லா அல் மசூரி, சிறு தொழில் துறை இணையமைச்சர், ஐக்கிய அரபு அமீரகம்.

இந்தியா - ஐக்கிய அரபு அமீரகம் இடையிலான பரஸ்பர வர்த்தகம், கடந்த ஆண்டில் 6.97 லட்சம் கோடி ரூபாயாக அதிகரித்தது. தமிழகத்தில் இருந்து அமீரகத்திற்கு ஜவுளி, ஆயத்த ஆடை அதிகம் ஏற்றுமதியாகிறது.

நந்தினி,

தென் மண்டல தலைவர், சி.ஐ.ஐ.,

இந்தியாவில் உற்பத்தி துறை, டிஜிட்டல் தொழில்நுட்பம், எலக்ட்ரானிக்ஸ் உட்பட பல துறைகளில் தமிழகம் முன்னணியில் உள்ளது.

தினேஷ்,

சர்வதேச கவுன்சில்

தலைவர், சி.ஐ.ஐ.,

அமீரக அமைச்சர் அப்துல்லா இன்று முதல்வர் ஸ்டாலினை சந்திக்கிறார்