கோவை தமிழ்நாடு வேளாண் பல்கலையில் பொங்கல் விழா நேற்று நடந்தது. விழாவில் பங்கேற்ற பல்கலை துணைவேந்தர் கீதாலட்சுமி கூறியதாவது: உணவு உற்பத்தியில் தன்னிறைவு அடைந்து ஏற்றுமதி செய்யும் நாடாக இந்தியா உள்ளது. தற்போது நாட்டின் உணவு உற்பத்தி, 32.50 கோடி டன்னாக உள்ளது.

இதில், வேளாண் பல்கலையின் பங்கு முக்கியமானது. 900க்கும் மேற்பட்ட ரகங்களை கண்டறிந்துள்ளோம். இதில், 138 ரகங்கள் இன்றும் விதை தொடரில் உள்ளன. குறைந்த வயது, நல்ல விளைச்சல், பருவகால மாற்றத்துக்கு ஏற்றதாக இருக்கும் வகையில் புதிய ரகங்கள் கண்டறியப்படுகின்றன.

பல்கலையின் 1,500 தொழில்நுட்பங்களில், 500க்கும் மேற்பட்ட தொழில்நுட்பங்கள் விவசாயிகளால் பயன்படுத்தப்படுகின்றன. பூச்சி, நோய்கள் உள்ளிட்ட பல்வேறு சவால்களை சந்திக்கிறோம்.

பல்கலையில் மக்காச்சோளம் வாயிலாக எத்தனால் தயாரிப்புக்காக, பல்வேறு சிறப்பு திட்டங்கள் செயல்படுத்தப்படுகின்றன. மக்காச்சோளத்தில் சாறு அதிகம் இருக்குமாறு, புதிய கண்டுபிடிப்புகள் அறிமுகப்படுத்தப்பட்டு உள்ளன. இவ்வாறு அவர் கூறினார்.

பல்கலைக்கழக பயிர் மேலாண்மை இயக்குனர் கலாராணி உள்ளிட்ட பலர் நிகழ்ச்சியில் பங்கேற்றனர்.

- நமது நிருபர் -