தொழிலாளர் சட்டங்களை சீர்திருத்துவதற்காக மத்திய அரசு நான்கு தொழிலாளர் சட்டங்களை அறிமுகப்படுத்தியது. இவை, கடந்த 2020 அக்டோபர் 1ம் தேதி இயற்றப்பட்ட சட்டங்கள் ஆகும். அவை அமலுக்கு வந்துள்ளதாக மத்திய அரசு அறிவித்திருக்கிறது.

அதன்படி, ஊதியச்சட்டம்- 2019, தொழில் உறவுச் சட்டம்-2020, சமூகப் பாதுகாப்புச் சட்டம்- 2020, தொழிலக பாதுகாப்பு மற்றும் ஆரோக்கிய, பணிச்சூழல் சட்டம்- 2020 ஆகிய இச்சட்டங்கள் அறிமுகமாவதன் மூலம் பழைய 29 தொழிலாளர் சட்டங்கள் நீக்கப்படுகின்றன.

நான்கு சட்டங்கள் 1 ஊதியச்சட்டம்-2019: ஏற்கனவே நடைமுறை யில் உள்ள நான்கு சட்டங்களுக்கு பதிலாக இச்சட்டம் கொண்டு வரப்படுகிறது. எல்லா ஊழியர்களுக்கும் குறைந்தபட்ச ஊதியம் மற்றும் குறித்த நேரத்தில் சம்பளப் பட்டுவாடா ஆகிய அம்சங்களை ஒன்று சேர்த்து இச்சட்டம் வடிவமைக்கப்பட்டுள்ளது.

2 தொழிலக உறவுகள் சட்டம்-2020: மூன்று பழைய சட்டங்களை ஒருங்கிணைத்து இச்சட்டம் உருவாக்கப்பட்டுள்ளது. தொழிற்சங்கங்கள், பணிச்சூழல், தொழில் தகராறு தொடர்பான விதிகளில் இது கவனம் செலுத்துகிறது.

3 சமூகப் பாதுகாப்புச் சட்டம்-2020: ஒன்பது சட்டங்களை ஒன்று சேர்த்து, முறைசார்ந்த மற்றும் முறைசாரா தொழிலாளர்களுக்கு இ.பி.எப்., பென்ஷன் திட்டம் முதலிய சமூகப் பாதுகாப்புத் திட்டங்களை இது வழங்கும்.

4 தொழிலக பாதுகாப்பு, ஆரோக்கியம் மற்றும் பணிச்சூழல் சட்டம்-2020: மொத்தம் 13 சட்டங்களை ஒருங்கிணைத்து, பணியிடப் பாதுகாப்பு, ஆரோக்கியம், பணிச்சூழல் (குறிப்பாக சுரங்கங் கள், தோட்டத் தொழில்களுக்கான சிறப்பு விதிகள் அடங்கியது) ஆகியவற்றைக் கொண்டது.

கிடைப்பது என்ன?

* உரிய நேரத்தில் குறைந்தபட்ச ஊதியம்

* இளைஞர்களுக்கு நியமன கடிதம் கட்டாயம்

* பெண்களுக்கு சம ஊதியம், மரியாதை

* 40 கோடி தொழிலாளர்களுக்கு சமூக பாதுகாப்பு

* குறித்த காலத்துக்கான ஊழியர்களுக்கு ஓராண்டுக்கு பிறகு பணிக்கொடை

* 40 வயதுக்கு மேற்பட்ட ஊழியர்களுக்கு வருடாந்திர உடல் பரிசோதனை.

-நமது சிறப்பு நிருபர்-