நெஸ்லேக்கு புதிய தலைவர் உணவுப் பொருட்கள் தயாரிப்பில் ஈடுபட்டு வரும் நெஸ்லே இந்தியா நிறுவனத்தின் புதிய தலைவராக மனீஷ் திவாரி நியமிக்கப்பட்டுள்ளார். தற்போது நிறுவனத்தின் தலைவராகவும், நிர்வாக இயக்குநராகவும் பணியாற்றி வரும் சுரேஷ் நாராயணன், இம்மாதத்துடன் பணி ஓய்வு பெறுவதைத் தொடர்ந்து, புதிய தலைவர் நியமிக்கப்பட்டுள்ளார். மனீஷ் திவாரி, வரும் 2030 ஜூலை மாதம் வரை நெஸ்லே நிறுவனத்தின் நிர்வாக இயக்குநர் பொறுப்பையும் வகிப்பார் என தெரிவிக்கப்பட்டுள்ளது.

கூகுள் மேல்முறையீடு இந்திய சந்தை போட்டி ஆணையத்துக்கு எதிரான வழக்கில், தேசிய நிறுவன சட்ட மேல்முறையீட்டு தீர்ப்பாயத்தின் உத்தரவை எதிர்த்து, கூகுள் நிறுவனம் உச்ச நீதிமன்றத்தில் மேல் முறையீடு செய்துள்ளது. ஆன்ட்ராய்டு கட்டமைப்பில் தனது ஆதிக்கத்தை தவறாகப் பயன்படுத்தி, நியாயமற்ற பிளே ஸ்டோர் விதிமுறைகள் மற்றும் கூகுள் பிளே செயலியின் பயன்பாட்டை ஊக்குவித்ததாக, கூகுள் மீதான விசாரணையில் இந்திய போட்டி ஆணையம் தெரிவித்திருந்தது. இதை தேசிய நிறுவன சட்ட மேல்முறையீட்டு தீர்ப்பாயம் உறுதிப்படுத்தியது.