இதையடுத்து கூட்டத்தின் இறுதியில், வங்கிகளுக்கு வழங்கும் குறுகியகால கடனுக்கான 'ரெப்போ' வட்டி விகிதத்தில் எந்த மாற்றமும் இல்லை என்றும், தொடர்ந்து 6.50 சதவீத வட்டியே தொடரும் என்றும் அறிவிக்கப்பட்டது.

கூட்டத்தில் எடுக்கப்பட்ட முக்கிய முடிவுகள் குறித்து ரிசர்வ் வங்கி வெளியிட்ட அறிவிப்புகள்:

 வங்கிகளுக்கு வழங்கப்படும் குறுகிய கால கடனுக்கான ரெப்போ வட்டி விகிதம், 6.50 சதவீதமாக தொடரும்

 நடப்பு நிதியாண்டில், 7.30 சதவீதமாக உள்ள நாட்டின் பொருளாதார வளர்ச்சி அடுத்த நிதியாண்டில் 7 சதவீதமாக இருக்கும்

 நடப்பு நிதியாண்டில் பணவீக்கம் 5.40 சதவீதமாக இருக்கும். அடுத்த நிதியாண்டில் இது 4.50 சதவீதமாக குறைய வாய்ப்புள்ளது

 இணைய தொடர்பு முழுமையாக கிடைக்காத இடங்களில், சில்லரை பரிவர்த்தனைகளில் டிஜிட்டல் கரன்சியை பயன்படுத்த, அதன் ஆப்லைன் வடிவம் அறிமுகப்படுத்தப்பட உள்ளது

 தற்போதைய பொருளாதார உத்வேகம் அடுத்த நிதியாண்டிலும் தொடரக்கூடும்

 ராபி பருவ விதைப்பில் மீட்சி, உற்பத்தியில் நீடித்த லாபம், சேவைகள் துறையின் மீளும் திறன் ஆகியவை, வரும் நிதியாண்டில் பொருளாதார நடவடிக்கைகளுக்கு ஆதரவு அளிக்கும்

 முதலீடு அதிகரிக்க துவங்கியுள்ளது. குறிப்பாக தனியார் துறையின் மூலதன செலவீனம் மறுமலர்ச்சி அடைவதற்கான அறிகுறிகள் தென்படுகின்றன

 நாட்டின் பொருளாதாரம் வலுவான, நீடித்த வளர்ச்சிப் பாதையில் நம்பிக்கையுடன் முன்னேறி வருகிறது

 கிராமப்புற தேவைகள் அதிகரிக்க துவங்கியுள்ளன; நகர்ப்புற நுகர்வு தொடர்ந்து வலுவாகவே உள்ளது

 அரசு நிதி ஒருங்கிணைப்பு பாதையை பின்பற்றுகிறது. உள்நாட்டு பொருளாதார நடவடிக்கைகளும் வலுவாகவே உள்ளன

 உணவு பொருட்களின் விலையில் நிலவும் நிச்சயமற்ற தன்மை பணவீக்கத்தை தொடர்ந்து பாதிக்கிறது

 அதிகரித்து வரும் பதற்றமான புவிசார் அரசியல் சூழல் காரணமாக வினியோக சங்கிலி பாதிப்பு அடைந்து, பொருட்களின் விலை அதிகரிக்கிறது

 அன்னிய செலாவணி கையிருப்பு, 51.66 லட்சம் கோடி ரூபாயாக உள்ளது. நாட்டின் நிதித்துறை ஆரோக்கியமான இருப்பு நிலையுடன் வலுவாகவே உள்ளது

 இணக்கம், நுகர்வோர் நலன் பாதுகாப்பு ஆகிய வற்றுக்கு நிறுவனங்கள் அதிக முன்னுரிமை அளிக்க வேண்டும்

 நடப்பு நிதியாண்டில் இந்திய ரூபாயின் மாற்று விகிதம் நிலையானதாகவே இருந்தது

 அடுத்த பணக் கொள்கை குழுக் கூட்டம், ஏப்ரல் 3 முதல் 5ம் தேதி வரை நடைபெறும்.