இந்த நாடுகளின் அரசியலில் எலான் மஸ்க் தலையிடுவதாகவும், இந்நாட்டு அதிபர்கள், அரசியல் தலைவர்கள் மற்றும் கொள்கைகளை விமர்சனம் செய்வதாகவும், அதை ஏற்காத மக்கள், டெஸ்லா கார்களை வாங்க மறுப்பதாகவும் கூறப்படுகிறது.

அதாவது, ஜெர்மனியின் சான்சிலர் ஓலாப் ஷோல்ஸை முட்டாள் என்றும், அதிபர் வால்டர் ஸ்டெய்ன்மியரை சர்வாதிகாரி என்றும் மஸ்க் சாடி உள்ளார்.

அதேபோல், ஜெர்மனியின் வலதுசாரி கட்சியான ஏ.எப்.டி., கட்சிக்கு மஸ்க் ஆதரவு தெரிவித்ததை தொடர்ந்து, பிரான்ஸ் அதிபர் மேக்ரான், இவரை ஐரோப்பிய அரசியலில் தலையிடுவதாக விமர்சனம் செய்தார்.

பிரிட்டனில், அந்நாட்டு ஆற்றல் மற்றும் சுற்றுச்சூழல் சம்பந்தமான கொள்கைகள் மற்றும் பிரக்சிட் தொடர்பாகவும் மஸ்க் விமர்சனம் செய்தார். இதுபோன்ற விமர்சனங்கள், இந்த நாடுகளின் மக்கள் இடையே அதிருப்தியை ஏற்படுத்தியதன் காரணமாக, டெஸ்லா கார்களை மக்கள் புறக்கணித்துள்ளனர்.

மின்சார வாகன சந்தையில், சீன நிறுவனங்கள் மற்றும் ஐரோப்பிய நிறுவனங்களின் போட்டி, மின்சார வாகனங்களுக்கான மானியம் குறைப்பு ஆகியவையும் இந்நாடுகளில் டெஸ்லா கார்களின் விற்பனை வீழ்ச்சிக்கு காரணமாக அமைந்துள்ளன.

இதனால், டெஸ்லா கார்களுக்கு பதிலாக, போக்ஸ்வேகன், பி.எம்.டபிள்யூ., ஜாகுவார் மற்றும் மினி மின்சார கார்களை வாங்குவதில் ஐரோப்பிய மக்கள் அதிகம் ஆர்வம் காட்டுவதாக கூறப்படுகிறது.