வரும் 2025- - 26ம் நிதியாண்டுக்கான பட்ஜெட், அடுத்தாண்டு பிப்ரவரியில் தாக்கல் செய்யப்பட உள்ளது.

இந்நிலையில், இந்திய தொழில் வர்த்தக சபை சம்மேளனம் மற்றும் இந்திய தொழில் கூட்டமைப்பு ஆகியவை தனித்தனியே, மத்திய வருவாய் செயலர் சஞ்சய் மல்ஹோத்ராவிடம் அளித்துள்ள, பட்ஜெட்டுக்கு முந்தைய பரிந்துரையில் தெரிவித்துள்ளதாவது:

வரி செலுத்துவோரின் சிரமங்களை குறைப்பதுடன், தேவையற்ற வழக்கு வாய்தாக்களை குறைக்கும் வகையில், டி.டி.எஸ்., விகிதங்களை எளிமைப்படுத்த வேண்டும்.

வருமான வரி சட்டத்தின் கீழ், 37 வகையான செலுத்தல்களுக்கு, 0.1 சதவீதம் முதல் 30 சதவீதம் வரை பல்வேறு விகிதங்களில் டி.டி.எஸ்., தொகை பிடித்தம் செய்யப்படுகிறது.

இவற்றின் வகைப்படுத்தலில் தேவையற்ற குழப்பம் ஏற்படுவதால், தொழில்களுக்கு கணிசமான ரொக்கம் கிடைப்பது தடைபடுகிறது. மேலும், அரசு ரீபண்டு தொகைக்கு வட்டி செலுத்த வேண்டிய நிலை ஏற்படுகிறது.

பல்வேறு வகையான செலுத்தல்களுக்கு, 5 சதவீதத்தில் இருந்து 2 சதவீதமாக டி.டி.எஸ்., கட்டணத்தை குறைப்பதன் வாயிலாக, அரசு எளிமைப்படுத்தலை மேற்கொள்வது நல்ல துவக்கமாக இருக்கும்.

மேலும், டி.டி.எஸ்., விகிதத்தை, சம்பளத்திற்கான விகிதம் குறைவாகவும், லாட்டரி மற்றும் ஆன்லைன் விளையாட்டு கள் உள்ளிட்டவற்றிற்கு அதிகமாகவும், பிற பல்வேறு வகையான செலுத்தல்களுக்கு நிலையான விகிதம் எனவும் மூன்று அடுக்குகளாக பிரித்து வகைப்படுத்தலாம்.

இவ்வாறு அதில் தெரிவித்து உள்ளன.