கடந்த 2005 முதல், வெள்ளி பொருட்களுக்கு ஹால்மார்க் முத்திரை பதிப்பது தன்னார்வ தேர்வாகவே இருந்தது. 2025, செப்டம்பர் முதல் 'ஹெச்.யூ.ஐ.டி.,' எனும் ஹால்மார்க் தனித்துவ அடையாள எண் பதிக்கப்பட்டு வருகிறது. இதை வைத்து வெள்ளியின் துாய்மையை சரிபார்க்கலாம்.

இந்நிலையில், தங்கத்தை விட வெள்ளியில் ஹால்மார்க் பதிப்பது சவாலானது என்று பி.ஐ.எஸ்., பொது இயக்குநர் சஞ்சய் கார்க் தெரிவித்துள்ளார்.

அவர் மேலும் கூறியதாவது:

சிறு கடைகள் முதல் பெரிய கடைகள் வரை வெள்ளி விற்பனை செய்கின்றன. நகை மட்டுமின்றி, வெள்ளியில் பர்னிச்சர் வரை பல்வேறு தயாரிப்புகள் இருக்கின்றன. கட்டாய ஹால்மார்க் முறையை எப்படி அமல்படுத்துவது என்று ஆய்வு செய்து வருகிறோம்.

தற்போது பி.ஐ.எஸ்., அமைப்பில் ஒட்டுமொத்த ஹால்மார்க் செயல்பாடுகளையும் 5 பேர் மட்டும் நடத்துகின்றனர். மற்ற வேலைகள் 'அவுட்சோர்ஸ்' செய்யப்பட்டுள்ளன. தன்னார்வமாக ஹால்மார்க் பதிப்பதில் அதிக முன்னேற்றம் இருந்தாலும், பி.ஐ.எஸ்., கவனமாகவே செயல்படுகிறது.

தவறுகளை தவிர்ப்பதற்காக மெதுவாகவே நகருகிறோம். கட்டாய ஹால்மார்க் முறையை படிப்படியாக கொண்டு வருவோம்.

இவ்வாறு அவர் தெரிவித்தார்.