கூகுள் நிறுவனம், தன் வெளிப்படைத்தன்மையை நிரூபிக்கும் வகையில், அந்நிறுவனத்தின் வாயிலாக கடந்த 2018ம் ஆண்டு மே மாதம் முதல் டிஜிட்டல் விளம்பரங்கள் வெளியிட்டோரின் பட்டியலை சமீபத்தில் வெளியிட்டது.

இதில், தேசிய மற்றும் மாநில அளவிலான கட்சிகள் இடம்பிடித்துள்ளன.

இதுகுறித்து கூகுள் நிறுவனம் வெளியிட்ட அறிக்கை:

கடந்த 2018ம் ஆண்டு மே 31 முதல், நேற்று முன்தினம் வரை கூகுள் நிறுவனத்தின் வாயிலாக, பா.ஜ., காங்கிரஸ், தி.மு.க., உள்ளிட்ட அரசியல் கட்சிகள், டிஜிட்டல் விளம்பரங்களுக்காக 390 கோடி ரூபாய் செலவிட்டு உள்ளன.

இதில், பா.ஜ., மட்டும் 101 கோடி ரூபாய் செலவிட்டுள்ளன.

இதற்கு அடுத்தடுத்த இடங்களில் காங்கிரஸ் 45 கோடி ரூபாயும், தி.மு.க., 42 கோடி ரூபாயும், தெலுங்கானா முன்னாள் முதல்வர் சந்திரசேகர ராவின் பாரத் ராஷ்ட்ர சமிதி, 12 கோடி ரூபாயும் செலவிட்டுள்ளன.

இதேபோல் அரசியல் ஆலோசகர் பிரசாந்த் கிஷோர் நடத்தும் ஐ - பேக் நிறுவனம் வாயிலாக, ஆந்திராவின் ஒய்.எஸ்.ஆர்., காங்கிரஸ் 6.4 கோடி ரூபாயும், அதற்கு அடுத்ததாக, மேற்கு வங்கத்தின் திரிணமுல் காங்கிரஸ் 4.8 கோடி ரூபாயும் டிஜிட்டல் விளம்பரங்களுக்காக செலவிட்டுள்ளன.

கூகுள் வாயிலாக டிஜிட்டல் விளம்பரங்கள் அதிகளவு ஒளிபரப்பப்பட்ட மாநிலங்களில் தமிழகம் முதலிடம் வகிக்கிறது.

அதற்கு அடுத்ததாக தெலுங்கானா, உத்தர பிரதேசம், கர்நாடகா, மத்திய பிரதேசம் ஆகிய மாநிலங்கள் உள்ளன.இவ்வாறு அதில் குறிப்பிடப்பட்டுள்ளது.