சமீப காலமாக பல்வேறு காரணங்களால், டில்லி காற்றின் தரம் மிகவும் மோசமாகிக் கொண்டே வருகிறது. காற்றின் சுத்தத்தன்மையை ஏ.க்யு.ஐ., என்ற குறியீடு மூலம், தினமும் காலையில் குறிப்பிடப்படுகிறது.

அந்த வகையில், 0 - 50 சிறப்பு; 51 - 100 திருப்திகரம்; 101 - 200 சராசரி; 201 - 300 மோசம்; 301 - 400 மிகவும் மோசம்; 401 - 500 மிகவும் அபாயகரமான நிலை என குறிப்பிடப்படுகிறது.

நேற்று காலை நிலவரப்படி, டில்லி நகரின் சராசரி ஏ.க்யு.ஐ., 311 என இருந்தது. எனினும், அலிப்பூர் - 421, வாசிர்புர் - 407, பாவனா 402, ஆனந்த்விஹார் - 412 என்ற அளவில் இருந்தது. இது, மிகவும் அபாயகரமான நிலையை குறிப்பிடுகிறது. 17 வானிலை ஆய்வு மையங்களில் காற்றின் சுத்தத்தரம் மிகவும் மோசமாக, 300க்கு மேலேயே இருந்தது.

டில்லியின் அதிகபட்ச வெப்ப நிலை 29 டிகிரி செல்ஷியஸ்; குறைந்தபட்ச வெப்பநிலை இந்த சீசனின் சராசரி அளவை விட, 1.2 செல்ஷியஸ் அதிகரித்து, 16.5 டிகிரி செல்ஷியஸ் என்ற அளவில் இருந்ததாக, வானிலை ஆய்வு மையத்தின் சமீர் என்ற செயலியில் குறிப்பிடப்பட்டுள்ளது.