பின் செய்தியாளர்களிடம் பேசிய அவர், இந்தியாவின் ராணுவ தளவாடங்கள் ஏற்றுமதி, தற்போது 23,000 கோடி ரூபாயை தாண்டி சாதனை நிலையை எட்டியுள்ளது என்று தெரிவித்தார். 10 ஆண்டுகளுக்கு முன் இது வெறும் 2,000 கோடி ரூபாயாக மட்டுமே இருந்தது.

100- நாடுகள் கடந்த 2016க்கு பின் உள்நாட்டு உற்பத்தி அதிகரித்ததால், இந்தியாவில் தயாராகும் ராணுவ தளவாடங்கள் 100-க்கும் மேற்பட்ட நாடுகளுக்கு ஏற்றுமதி செய்யப்படுகின்றன.

புல்லட் பாதுகாப்பு உடைகள், ரோந்து படகுகள், ரேடார், ஹெலிகாப்டர், இலகுரக நீர்மூழ்கி குண்டு போன்ற பல பொருட்கள் வெளிநாடுகளுக்கு ஏற்றுமதி ஆகின்றன.

இது மட்டுமின்றி, 'பிரம்மோஸ்' ஏவுகணைகள், 'டோர்னியர் 228' விமானம், 'ஆகாஷ்' வான் பாதுகாப்பு அமைப்பு, 'பினாகா ராக்கெட் லாஞ்சர்' போன்ற பெரிய அளவிலான ஆயுதங்களும் வெளிநாடுகளுக்கு அனுப்பப்படுகின்றன.

பாரத் மின்னணு நிறுவனம் மட்டும் 51 நாடுகளுக்கு ஏற்றுமதி செய்கிறது. தனியார் நிறுவனங்களான, 'கல்யாணி சிஸ்டம்ஸ்' மற்றும் 'பாரத் போர்ஜ்' ஆகியவையும் முக்கிய பங்காற்றுகின்றன.

மேற்கு ஆசிய நாடுகளான ஆர்மேனியா, இஸ்ரேல், ஐரோப்பிய நாடான பிரான்ஸ் மற்றும் அமெரிக்கா ஆகியவை இந்தியாவின் புதிய, பெரிய வாடிக்கையாளர்களாக உள்ளன.

ஆசிய நாடான பிலிப்பைன்ஸ் 3,300 கோடி ரூபாய் மதிப்பில் பிரம்மோஸ் ஏவுகணைகள் வாங்க ஒப்பந்தம் செய்துள்ளது.

ஆசியாவில் சீனாவின் செல்வாக்கை சமநிலைப்படுத்த விரும்பும் நாடுகள் இந்தியாவை நம்புகின்றன. மேற்கு ஆசியா மற்றும் ஆப்ரிக்க நாடுகள், அரசியல் நிபந்தனைகள் இன்றி ஆயுதங்களை வழங்கும் நம்பகமான நாடாக இந்தியாவைக் கருதுகின்றன.

சவால்கள் ராணுவ தளவாட ஏற்றுமதியை உயர்த்த, மத்திய அரசு 2020ல் இத்துறையின் கொள்முதல் நடைமுறையை மாற்றியது.

சில வகை ஆயுதங்களின் இறக்குமதியை கட்டுப்படுத்தியது. உள்நாட்டு் உற்பத்திக்கு முன்னுரிமை வழங்கியது. புதிய நிறுவனங்களை ஊக்குவிக்க, 'ஐடெக்ஸ்' எனப்படும் ராணுவ உற்பத்தியில் புதுமையை கொண்டு வரும் திட்டத்தின் கீழ் நிதி ஒதுக்கப்பட்டது.

வெளிநாடுகளில் உள்ள நம் நாட்டு துாதரகங்களும், ராணுவ தளவாடங்களை அந்தந்த நாடுகளில் விளம்பரம் செய்கின்றன.

உத்தர பிரதேசம் மற்றும் தமிழகத்தில் உள்ள ராணுவ தளவாட தொழில் வழித்தடங்கள், 9,145 கோடி ரூபாய் மதிப்பிலான முதலீடுகளை ஈர்த்துள்ளன.

இருப்பினும் தொழில்நுட்பங்களில் வெளிநாட்டு சார்பு, உற்பத்தி தாமதம், பராமரிப்பு சேவை குறைபாடு போன்ற சில சவால்கள் உள்ளன.

'ஹிந்துஸ்தான் ஷிப்யார்ட்' நிறுவனம் 2024 - 25 வரை நஷ்டத்தில் இயங்கியதால், ஏற்றுமதி டெண்டர்களில் பங்கேற்க முடியவில்லை.

இந்த சவால்களை சமாளித்து, குறித்த நேரத்தில் உற்பத்தி செய்து, விற்பனைக்குப் பிந்தைய சேவையை மேம்படுத்தினால், இந்தியா நிர்ணயித்துள்ள ஆண்டுக்கு 50,000 கோடி ரூபாய் ராணுவ தளவாடங்கள் ஏற்றுமதி இலக்கை, 2029க்குள் எளிதில் எட்ட முடியும் என நிபுணர்கள் கூறு கின்றனர்.

- நமது சிறப்பு நிருபர் -