மேற்கு வங்கத்தில் வடக்கு 24 பர்கனாஸ் மாவட்டத்தில் உள்ளது சந்தேஷ்காலி. இப்பகுதியில் வசித்த பழங்குடியின மக்களை மிரட்டி, நிலங்களை ஷாஜஹான் ஷேக் தன் ஆதரவாளர்கள் உதவியுடன் பறித்துள்ளார். மேலும் பல பெண்களை பாலியல் பலாத்காரம் செய்துள்ளார். மேலும் பல புகார்கள் அவர் மீது கூறப்பட்டது. இது தொடர்பான வழக்கை விசாரிக்க சி.பி.ஐ.,க்கு கோல்கட்டா உயர்நீதிமன்றம் உத்தரவிட்டது. இதன்படி சி.பி.ஐ., அதிகாரிகள் தீவிர விசாரணை நடத்தி வருகின்றனர்.

இந்நிலையில் சந்தேஷ்காலியில் ரேசன் முறைகேடு புகார் தொடர்பாக விசாரிக்க சென்ற அமலாக்கத்துறை அதிகாரிகளை தாக்கியது தொடர்பான வழக்கு தொடர்பாக சி.பி.ஐ., அதிகாரிகள் ஒரு வீட்டில் சோதனை நடத்தினர்.

இந்தச் சோதனையில், ஆயுதங்கள், வெடிமருந்துகள், நாட்டு வெடிகுண்டுகள் உள்ளிட்டவை பறிமுதல் செய்யப்பட்டன. இதனையடுத்து தேசிய பாதுகாப்பு படையின் வெடிகுண்டு தடுப்பு பிரிவினர் அங்கு விரைந்து உள்ளனர்.

மேல்முறையீடு

இதனிடையே, சந்தேஷ்காலி சம்பவம் தொடர்பாக சி.பி.ஐ., விசாரணை நடத்துமாறு கோல்கட்டா உயர்நீதிமன்றம் பிறப்பித்த உத்தரவை எதிர்த்து மேற்கு வங்க அரசு உச்சநீதிமன்றத்தில் மனு தாக்கல் செய்துள்ளது.