ஆக்கிரமிப்பு அகற்றம் அசாமின் கோலாகட் மாவட்டத்தில் உள்ள ரெங்கமா ரிசர்வ் வனப்பகுதிக்கு உட்பட்ட நிலங்களை சட்டவிரோதமாக ஆக்கிரமித்து, 350க்கும் மேற்பட்ட குடும்பத்தினர் வசித்து வந்தனர். இது, சுற்றுச்சூழல் சீர்கேட்டை ஏற்படுத்துவதாக இயற்கை ஆர்வலர்கள் புகார் எழுப்பினர். இதையடுத்து, அங்கு வசித்த மக்களுக்கு மாவட்ட நிர்வாகம் சார்பில் நோட்டீஸ் அனுப்பப்பட்டது. இந்நிலையில், போலீஸ் மற்றும் மத்திய ரிசர்வ் போலீஸ் படை பாதுகாப்புடன் அங்குள்ள ஆக்கிரமிப்பு பகுதிகளை நேற்று அகற்றினர். இதன் வாயிலாக, வனப்பகுதிக்கு உரிய 329 ஏக்கர் நிலப்பரப்பு மீட்கப்பட்டுள்ளதாக அதிகாரிகள் தெரிவித்தனர். அங்கு வசித்த மக்களுக்கு, மாற்று குடியிருப்பு வசதிகளையும் மாநில அரசு ஏற்படுத்தி தந்துள்ளது.