ஹிந்து - முஸ்லிம்கள் இடையில், சண்டையை மூட்டிவிட சிலர் முயற்சி செய்கின்றனர். ஆனால் இதையும் தாண்டி எம்மதமும் சம்மதம் என்ற உணர்வுடன், சமூக நல்லிணக்கத்துடனும், சில இடங்களில் ஹிந்து - முஸ்லிம்கள் நடந்து கொள்கின்றனர்.

ஹிந்துக்கள் நடத்தும் பண்டிகைகளில், முஸ்லிம்கள் பங்கேற்கும் நிகழ்வுகளும் நடந்து உள்ளன. இந்நிலையில், முஸ்லிம் வீட்டில் அய்யப்ப பூஜை நடந்து உள்ளது. அது பற்றிய விபரம்:

கொப்பால், கங்காவதி டவுன் ஜெயநகரில் வசிப்பவர் காசிம் அலி முத்தபள்ளி. இவர், அப்பகுதி முஸ்லிம் சமூக தலைவராக உள்ளார். சமூக நல்லிணக்கத்தை கடைப்பிடிக்கும் இவரது வீட்டில், அய்யப்ப பூஜை நேற்று முன்தினம் இரவு நடந்தது. இதில் சபரிமலை அய்யப்பன் கோவிலுக்கு, மாலை அணிந்து உள்ள பக்தர்கள் பங்கேற்றனர்.

இவர்களுடன் சேர்ந்து அய்யப்ப பாடல்களை பாடி, காசிம் அலி முத்தபள்ளியும், அய்யப்பனுக்கு சிறப்பு பூஜை செய்தார். இதன்பின், அய்யப்ப பக்தர்களுக்கு, தன் வீட்டில் உணவு பரிமாறினார். இதுதொடர்பான வீடியோ சமூக வலைதளங்களில் பரவி வருகிறது.