டில்லி உயர் நீதிமன்றத்தின் 60வது ஆண்டு விழாவை முன்னிட்டு நடந்த நிகழ்ச்சியில், டீப் பேக்குகள் மற்றும் ஏஐ தொழில் நுட்பத்தின் தவறான பயன்பாட்டை எவ்வாறு கையாள வேண்டும் என்பது குறித்து சுப்ரீம்கோர்ட் தலைமை நீதிபதி சூர்யகாந்த் பேசினார்.

அவர் கூறியதாவது: 10 ஆண்டுகளுக்கு முன்பு கற்பனை செய்யக்கூட முடியாத சவால்களை இன்றைக்கு நீதிமன்றங்கள் எதிர்கொள்கின்றன. செயற்கை நுண்ணறிவால் உருவாக்கப்பட்ட படைப்புகள் பதிப்புரிமைப் பாதுகாப்பைக் கோர முடியுமா, சட்ட அமைப்பு டீப்பேக்குகளை எவ்வாறு கையாள வேண்டும்.

தொழில்நுட்பம் தனிமனித உரிமைகளைச் சிதைக்க அனுமதிக்காமல் புதுமைகளை எவ்வாறு வளர்ப்பது என்பன போன்ற சவால்கள் இதில் அடங்கும். இதற்கு எல்லாம் சட்டப் புத்தகத்தில் உடனடியாக பதில்கள் கிடைப்பது அரிது. சட்டம் மவுனமாக இருக்கும் இடங்களில், அரசியலமைப்பு சட்டமே நமக்கு வழிகாட்ட வேண்டும்.

உச்ச நீதிமன்றம் டில்லி உயர் நீதிமன்றத்துடன் ஒரு சிறப்பு உறவைப் பேணி வருகிறது. அது வெறும் அருகாமையில் இருப்பதால் மட்டுமல்ல, மற்ற உயர் நீதிமன்றங்களுடன் ஒப்பிடும்போது உச்ச நீதிமன்றத்தின் பணிச்சுமையில் மிகப் பெரிய பங்கை டில்லி உயர்நீதிமன்றம் சுமப்பது தான் காரணம். இவ்வாறு சூர்யகாந்த் பேசினார்.