தென்கிழக்கு ஆசிய நாடுகளின் கூட்டமைப்பான 'ஆசியான்' அமைப்பில், இந்தோனேஷியா, மலேஷியா, பிலிப்பைன்ஸ், சிங்கப்பூர் உட்பட, 10 நாடுகள் உறுப்பினர்களாக உள்ளன. இந்த ஆண்டு ஆசியான் கூட்டமைப்பின் தலைமை பொறுப்பு மலேஷியா வசம் உள்ளது. நாம் இந்த அமைப்பின் முக்கிய நட்பு நாடாக உள்ளோம். மலேஷிய தலைநகர் கோலாலம்பூரில் நேற்று துவங்கிய இந்த அமைப்பின் உச்சி மாநாடு நாளையுடன் நிறைவு பெறுகிறது.

இந்த மாநாட்டில் பங்கேற்க பிரதமர் மோடிக்கு பதிலாக வெளியுறவுத்துறை அமைச்சர் ஜெய்சங்கர் மலேஷியா சென்று இருக்கிறார். ஆசியான் உச்சிமாநாட்டின் ஒரு பகுதியாக, அமெரிக்க வெளியுறவுத்துறை செயலாளர் மார்கோ ரூபியோவை வெளியுறவுத்துறை அமைச்சர் ஜெய்சங்கர் சந்தித்தார்.

இந்தியா- அமெரிக்கா இடையே நடந்து வரும் வர்த்தகப் பேச்சுவார்த்தைகளுக்கு மத்தியில் இருதரப்பு உறவுகளை வலுப்படுத்துவது குறித்து ஆலோசனை நடத்தினர். இது தொடர்பாக சமூக வலைதளத்தில் ஜெய்சங்கர் வெளியிட்டுள்ள பதிவில் கூறியிருப்பதாவது: இன்று காலை கோலாலம்பூரில் அமெரிக்க வெளியுறவுத்துறை அமைச்சர் மார்கோ ரூபியோவை சந்தித்ததில் மகிழ்ச்சி.

இருதரப்பு உறவுகளை வலுப்படுத்துவது மற்றும் உலகளாவிய பிரச்னைகள் குறித்து விவாதித்தோம். இவ்வாறு ஜெய்சங்கர் கூறியுள்ளார். அமெரிக்கா- இந்தியா ஆகிய இரு நாடுகளுக்கும் இடையே நடந்து வரும் வர்த்தகப் பேச்சுவார்த்தைகளுக்கு மத்தியில் இந்த சந்திப்பு நடந்துள்ளதால் முக்கியத்துவம் வாய்ந்ததாக பார்க்கப்படுகிறது.