ஜம்மு அருகே உள்ள அக்னுார் என்ற இடத்தில், 9ம் ஆண்டு ஆயுதப்படை வீரர்கள் தினம் நேற்று கொண்டாடப்பட்டது. இதில் நம் ராணுவ அமைச்சர் ராஜ்நாத் சிங் பங்கேற்று பேசியதாவது: ஆட்சியில் இருந்த முந்தைய அரசுகள் காஷ்மீரை வேறு விதமாக நடத்தின. அதன் காரணமாக இங்கு வசிக்கும் நம் சகோதர - சகோதரிகளுக்கு டில்லியுடன் நெருங்கிய உறவு இல்லாமல் போனது.

நியாயமாக நெருக்கமான உறவு இருந்திருக்க வேண்டும். காஷ்மீருக்கும் நாட்டின் பிறபகுதிகளுக்கும் இடையே உள்ள இடைவெளியை நிரப்பும் பணியில் இந்த அரசு ஈடுபட்டுள்ளது.

அந்த பணியில் சிறப்பாக செயல்பட்டு வரும் ஜம்மு - காஷ்மீர் முதல்வர் ஒமர் அப்துல்லாவுக்கு வாழ்த்துக்கள். இந்தியாவுக்கு எதிராக வன்முறையை துாண்டும் விதமாக பேசி வரும் பாக்., ஆக்கிரமிப்பு காஷ்மீர் பகுதியின் பிரதமர் சவுத்ரி அன்வருல் ஹக்குக்கு கடும் கண்டனங்கள். பாக்., ஆக்கிரமிப்பு காஷ்மீர் இல்லாமல் ஜம்மு - காஷ்மீர் முழுமை பெறாது.

இவ்வாறு அவர் பேசினார்.

முன்னதாக அக்னுாரில், 108 அடி மூவர்ண கொடியை ஏற்றி வைத்த ராஜ்நாத் சிங், ராணுவ பாரம்பரிய அருங்காட்சியகத்தை திறந்து வைத்தார்.