டிட்வா புயலால் இலங்கை கடுமையாக பாதிக்கப்பட்டு உள்ளது. பலத்த மழை, வெள்ளத்தில் சிக்கி பலியானவர்களின் எண்ணிக்கை 153 ஆக அதிகரித்துள்ளது. நிலச்சரிவு, வெள்ளம் என பல ஆயிரக்கணக்கான மக்கள் பாதிக்கப்பட்டு உள்ளனர்.

மட்டக்களப்பு முழுமையாக வெள்ளத்தில் சிக்கி இருக்கிறது. அம்பாறை, கண்டி என பல பகுதிகளில் மழை இடைவிடாமமல் வருகிறது. ஆயிரக்கணக்கான வீடுகள் சேதம் அடைய, அங்கு உள்ளவர்கள் பாதுகாப்பான இடங்களுக்கு மாற்றப்பட்டு உள்ளனர்.

புயல் சீற்றத்தால் சிக்குண்டுள்ள இலங்கைக்கு உதவும் வகையில் இந்தியா உதவிக்கரம் நீட்டியுள்ளது. கப்பல்கள் மூலம் உணவு பொருட்கள் அங்கு அனுப்பி வைக்கப்பட்டுள்ளன. இலங்கை விமான படையுடன் இணைந்து தேடுதல் பணிகளில் இறங்கவும், வெள்ளத்தில் சிக்கியோரை மீட்கவும் 2 ஹெலிகாப்டர்கள் அனுப்பி வைக்கப்பட்டு உள்ளன.

இதற்காக ஆபரேஷன் சாகர் பந்து என்ற மீட்பு நடவடிக்கையை தொடங்கி உள்ளது. இதன் பலனாக பாதிக்கப்பட்டவர்கள் தொடர்ந்து மீட்கப்பட்டு வருகின்றனர்.

இந் நிலையில், ஆபரேஷன் சாகர் பந்து மூலம் உயிர்கள் காப்பாற்றப்பட்டு உள்ளதாக வெளியுறவு அமைச்சக செய்தி தொடர்பாளர் ரந்திர் ஜெய்ஸ்வால் கூறி உள்ளார்.

இதுகுறித்து அவர் எக்ஸ் வலைதள பதிவில் குறிப்பிட்டு உள்ளதாவது;

ஆபரேஷன் சாகர் பந்து பல உயிர்களை காப்பாற்றியது. இலங்கையில் சூறாவளியால் பாதிக்கப்பட்ட பகுதிகளில் இன்று இந்திய கடற்படை ஹெலிகாப்டர்கள் மூலம் பலர் மீட்கப்பட்டனர்.

இவ்வாறு அவர் அந்த பதிவில் கூறி உள்ளார்.