பாகிஸ்தானுக்கு விரல் விட்டும் எண்ணும் அளவுக்கு, சில நாடுகளே ஆதரவாக உள்ளன. 'எதிரிக்கு எதிரி நண்பன்' என்ற முறையில், பாகிஸ்தானை சீனா ஆதரிக்கிறது. இது தவிர துருக்கி, அசர்பைஜான் மற்றும் ஹமாஸ் பயங்கரவாத அமைப்பு, பாகிஸ்தானின் அடாவடித்தனத்துக்கு ஆதரவு அளிக்கின்றன.

ஐ.எஸ்.ஐ.எஸ்., பயங்கரவாத அமைப்பு ராணுவ ரீதியாக ஒழித்துக்கட்டப்பட்டாலும், சித்தாந்த ரீதியாக ஹமாஸ் மற்றும், 'தி ரெஸிஸ்டென்ஸ் பிரன்ட்' என, பல்வேறு வடிவங்களில் உயிர் பெற்றுள்ளன. இவை தங்களுக்கு எப்போதும் பக்கபலமாக இருக்கும், என, பாக்., ராணுவம் தைரியமாக இருக்கிறது.

இவர்கள், இந்தியா மட்டுமின்றி, அமெரிக்கா, ரஷ்யா, பிரிட்டன், ஆப்கானிஸ்தான், இலங்கை, இஸ்ரேல் என பல நாடுகளில் தாக்குதல் நடத்தியுள்ளனர். இந்த பயங்கரவாதிகள் பாகிஸ்தானுக்குள் பதுங்கியிருப்பதால், அந்நாட்டுக்கு ஆதரவு தர அமெரிக்கா, ரஷ்யா என, எந்த நாடும் ஆதரவு தராது.

ஒவ்வொரு நாடும் இத்தகைய பயங்கரவாதத்தால், ஒவ்வொரு விதத்தில் பாதிக்கப்பட்டுள்ளன.

அதனால், பாகிஸ்தானுக்கு ஆதரவாக, சீனா, துருக்கி போன்ற நாடுகள் மட்டுமே முன் வர வாய்ப்புள்ளது.

வர்த்தக உறவு

இந்தியாவுடன் துாதரக ரீதியிலான உறவுகள் திருப்திகரமாக இல்லாவிட்டாலும், வர்த்தக உறவுகள் கணிசமாக இருப்பதால், சீனா யோசிப்பதாகவே தெரிகிறது. பாகிஸ்தானை விட இந்தியாவுடன் வர்த்தக திட்டங்கள் சீனாவுக்கு அதிகம் உள்ளன. மேலும், பொருளாதார நிலையில் மிகவும் மோசமாகி உள்ள பாகிஸ்தானுக்கு ஆயுதங்களை வாரி வழங்கினால், தங்களுக்கு எந்த லாபமும் வராது. செலவழிக்கும் நிதியை ஒருபோதும் திருப்பிப் பெற முடியாது என சீனா தயங்குகிறது.

ரஷ்யாவுக்கு எதிரான போரில், உக்ரைனுக்கு அமெரிக்க முன்னாள் அதிபர் பைடன் ஆயுத உதவி, பொருளாதார உதவி செய்தார். அதற்கு பதிலாக, டிரம்ப் அதிபரான பின், உக்ரைன் அதிபரை மிரட்டி பணிய வைத்து, கனிம வளங்களை அமெரிக்கா, ஒட்டுமொத்தமாக கபளீகரம் செய்தது.

பாகிஸ்தானில் அத்தகைய வளங்கள் எதுவும் இல்லை. இதனால், பாகிஸ்தானுக்கு உதவி செய்து சீனாவுக்கு என்ன லாபம்?

ரஷ்யாவுடன் இந்தியா நெருக்கமாக இருப்பதால், ரஷ்யாவின் நட்புறவை முறிக்கவும் சீனா விரும்பவில்லை. எனினும், மறைமுகமாக, பாகிஸ்தானுக்கு சிறிதளவு ஆயுத உதவிகளை சீனா வழங்க வாய்ப்புள்ளது.

'தற்போது பதற்றத்தை தணித்து அமைதியாக இருப்பதே நல்லது. பிரச்னையை வளர விட வேண்டாம்' என, பாகிஸ்தானுக்கு சீன வெளியுறவு அமைச்சர் வாங் யி அறிவுரை வழங்கியுள்ளார்.