இதைத்தொடர்ந்து பாகிஸ்தான் ராணுவம், நம் நாட்டின் மீது ட்ரோன் எனப்படும் ஆளில்லாத சிறிய ரக விமானங்கள் மற்றும் ஏவுகணைகள் வாயிலாக தாக்குதல் நடத்தியது. இதில், ஜம்மு - காஷ்மீரில் எல்லையோரம் வசித்த மக்கள் கடும் பாதிப்புக்குள்ளாகினர்.

கடந்த 7 - 10ம் தேதி வரை நடத்தப்பட்ட தாக்குதல்களில் மட்டும் ஜம்மு - காஷ்மீரில் 28 பேர் பலியாகினர். இதில், 13 பேர் பூஞ்ச் மாவட்டத்தைச் சேர்ந்தவர்கள். இந்நிலையில், ஜம்மு - காஷ்மீரின் பூஞ்சில், பாதிப்புக்குள்ளான பகுதிகளை லோக்சபா எதிர்க்கட்சி தலைவரும், காங்கிரஸ் - எம்.பி.,யுமான ராகுல் நேற்று பார்வையிட்டதுடன், பாதிக்கப்பட்ட மக்களுக்கு ஆறுதல் தெரிவித்தார்.

இது குறித்து சமூக வலைதளங்களில் புகைப்படங்கள், வீடியோக்களை பதிவிட்டு ராகுல் கூறுகையில், ''பாகிஸ்தான் நடத்திய ட்ரோன் தாக்குதலால், ஜம்மு - காஷ்மீர் மக்கள் கடுமையாக பாதிக்கப்பட்டுள்ளனர். பாகிஸ்தான் படையினர், மக்களின் இருப்பிடங்களை குறிவைத்து தாக்குதலை அரங்கேற்றி உள்ளனர். அங்கு வசிக்கும் மக்களின் குறைகளை கேட்டறிந்தேன்,'' என்றார்.