நாளை மும்பையில் பி.சி.சி.ஐ., வாரியத்தின் வருடாந்திர விழா நடைபெற உள்ளது. இந்த விழாவில், சச்சின் டெண்டுல்கருக்கு சி.கே. நாயுடு வாழ்நாள் சாதனை விருது வழங்கப்படுகிறது.

இது குறித்து பி.சி.சி.ஐ., வட்டாரங்கள் தெரிவித்துள்ளதாவது:

மும்பையில் நாளை நடைபெறும் பி.சி.சி.ஐ.,யின் வருடாந்திர விழாவில் டெண்டுல்கருக்கு மதிப்புமிக்க விருது வழங்கப்படும். இதற்கு முன்னர் ரவி சாஸ்திரி, பரூக் இன்ஜினியர் ஆகியோர் இந்த வாழ்நாள் சாதனையாளர் விருதுகளை பெற்றுள்ளார்கள்.

இந்தியாவுக்காக 664 சர்வதேச போட்டிகளில் விளையாடிய டெண்டுல்கர்,51, விளையாட்டு வரலாற்றில் அதிக டெஸ்ட் மற்றும் ஒருநாள் ரன்கள் எடுத்த சாதனையைப் படைத்துள்ளார். 2024 ஆம் ஆண்டிற்கான சி .கே. நாயுடு வாழ்நாள் சாதனையாளர் விருதை அவர் பெறுவார்.

டெண்டுல்கரின் 200 டெஸ்ட் மற்றும் 463 ஒருநாள் போட்டிகளில் பங்கேற்றது, விளையாட்டு வரலாற்றில் அதிகபட்சமாகும். அவர் டெஸ்ட் போட்டிகளில் 15,921 ரன்களையும், ஒருநாள் போட்டிகளில் 18,426 ரன்களையும் குவித்துள்ளார்.

இருப்பினும், அவர், ஒரே ஒரு டி20 சர்வதேச போட்டியில் மட்டுமே விளையாடியுள்ளார்.

இவ்வாறு அந்த வட்டாரங்கள் தெரிவித்துள்ளன.