கர்நாடக கூட்டுறவு அமைச்சர் ராஜண்ணாவை ஹனி டிராப் செய்ய முயன்ற விவகாரம், விஸ்வரூபம் எடுத்து உள்ள நிலையில், முதல்வர் சித்தராமையா மூன்று நாட்கள் பயணமாக நேற்று முன்தினம் டில்லி சென்றார். நேற்று காலை 10:30 மணிக்கு லோக்சபா எதிர்க்கட்சி தலைவர் ராகுலை, டில்லியில் உள்ள அவரது வீட்டில் சித்தராமையா சந்தித்தார்.

இருவரும் அரை மணி நேரத்திற்கு மேல் தனியாக ஆலோசனை நடத்தினர். இந்த சந்திப்பின் போது ராஜண்ணா ஹனி டிராப் விவகாரம்; அமைச்சரவை மாற்றம் உட்பட முக்கிய விஷயங்கள் குறித்து விவாதித்தனர். 'தற்போதைக்கு அமைச்சரவையில் மாற்றம் வேண்டாம். மே மாதத்திற்கு பின் பார்த்து கொள்ளலாம்' என்று சித்தராமையாவிடம், ராகுல் கூறி இருப்பதாக தகவல் வெளியாகி உள்ளது.

சித்தராமையாவின் 'எக்ஸ்' வலைதள பதிவு:

ராகுலை சந்தித்து பேசிய போது, தேர்தலின் போது கொடுக்கப்பட்ட வாக்குறுதியை பற்றி விவாதித்தேன்.

நம் நாட்டின் டிஜிட்டல் பொருளாதாரத்தின் முதுகெலும்பாக உள்ள அமேசான், ஓலா, ஊபர், பிளிப்கார்ட் உள்ளிட்ட நிறுவனங்களில் பணியாற்றும் தொழிலாளர்களுக்காக, அவர்கள் சார்ந்த நிறுவனங்களிடம் இருந்து 5 சதவீதம் செஸ் வரி வசூலிக்கப்படும்.

இதுபோன்று லட்சக்கணக்கான தொழிலாளர்கள் உள்ளனர். அவர்களுக்கு நல வாரியம் அமைக்க முடிவு செய்து உள்ளோம். நியாயமான ஊதியம், பாதுகாப்பை உறுதி செய்ய விரிவான சட்டம் கொண்டு வருவோம்; சமமான எதிர்காலத்தை உருவாக்குவதில் கர்நாடகா முன்னணியில் உள்ளது.

இவ்வாறு அவர் பதிவிட்டு உள்ளார்

. - நமது நிருபர் -