சில நேரங்களில், படிப்பது என்பது பல மாணவர்களுக்குப் பெரும் சுமையாகத் தெரிகிறது. எவ்வளவு நேரம் படித்தாலும் சில பாடங்கள் மனதில் நிற்பதில்லை என்ற கவலை பல மாணவர்களுக்கு இருக்கிறது. இதற்கு புத்திசாலித்தனம் குறைவாக இருக்கிறது என்பது அர்த்தம் அல்ல. நீங்கள் படிக்கும் முறை உங்கள் மூளையின் இயல்புக்கு ஒத்துப்போகாமல் இருப்பதே முக்கிய காரணம்.

ஒவ்வொரு மனிதரின் மூளையும் தகவல்களை உள்வாங்கும் விதத்தில் தனித்துவமானது. நாம் எந்த வழியில் சுலபமாகக் கற்றுக்கொள்கிறோம் என்பதை அறிந்துகொண்டால், படிப்பு தானாகவே எளிதாகும்.

பார்வை வழிக் கற்பவர்கள்

இதனைத் தொடர்ந்து, சில மாணவர்களுக்குப் புத்தகத்தை சும்மா வாசித்தால் மட்டும் புரியாது, ஆனால் வரைபடங்கள், வரைபட அட்டவணைகள், வண்ணக் குறிப்புகளைப் பார்த்தால் உடனே நினைவில் நிற்கும். இத்தகையவர்கள் பார்வை வழிக் கற்பவர்கள் ஆவர். இவர்களுக்கு மன வரைபடங்கள், வண்ணப் பேனாக்களால் அடிக்கோடிட்ட குறிப்புகள் மற்றும் காணொலிகள் மூலம் கற்கும் முறை பெருமளவில் உதவும். பாடங்களை வெறும் எழுத்துகளாகப் பார்க்காமல், அவற்றைச் சித்திரங்களாகவும் காட்சிகளாகவும் மனதில் உருவகப்படுத்திப் படிக்கும் போது நினைவாற்றல் பல மடங்கு கூடும்.

கேட்டல் வழிக் கற்பவர்கள்

இதைத் தவிர, ஆசிரியர் வகுப்பில் நடத்துவதை உற்றுக் கேட்டாலே பாதி பாடம் புரிந்துவிடும் மாணவர்கள் இருக்கிறார்கள். இவர்கள் கேட்டல் வழிக் கற்பவர்கள். இவர்களுக்குப் பாடங்களை உரக்கப் படித்துப் பார்ப்பது, நண்பர்களுடன் கலந்துரையாடுவது மற்றும் ஆசிரியர் விளக்கும் ஆடியோக்களைக் கேட்பது மூலம் எளிதாக பாடங்கள் புரியும்.

சூத்திரங்கள், வரலாற்று வருடங்கள் அல்லது அறிவியல் விதிகளைச் சிறிய ராகமாகவோ அல்லது கதையாகவோ மாற்றிப் படிக்கும் போது, இவர்களால் மிக எளிதாகத் தேர்வில் விடையளிக்க முடியும்.

செயல் வழிக் கற்பவர்கள்

ஒரே இடத்தில் உட்கார்ந்து மணிக்கணக்கில் படிக்க முடியாத மாணவர்களைப் பலரும் 'கவனக்குறைவு கொண்டவர்கள்' என்று தவறாக நினைக்கிறார்கள். ஆனால், அவர்கள் உண்மையில் தொட்டுணர்ந்து, செய்து பார்த்து கற்கும் செயல் வழிக் கற்பவர்களாக கூட இருக்கலாம். அறிவியல் சோதனைகள், மாதிரிகள் உருவாக்குதல், நாடகம் போல் செய்து பார்த்தல் போன்றவை இவர்களுக்குப் பாடத்தை ஆழமாகப் புரிய வைக்கும். கணிதக் கணக்குகளை வெறும் தாளோடு நிறுத்தாமல் பொருட்களின் மூலம் கூட்டிப் பார்ப்பது அல்லது நடந்து கொண்டே படிப்பது இவர்களின் கவனத்தை ஒருமுகப்படுத்தும்.

வாசித்தல் மற்றும் எழுதுதல் வழிக் கற்பவர்கள்

இதைத் தவிர, குறிப்புகளைத் திரும்பத் திரும்ப வாசிப்பதிலும், சொந்த நடையில் எழுதிப் பார்ப்பதிலுமே சில மாணவர்கள் புரிந்து கொள்வார்கள். இவர்கள் வாசித்தல் மற்றும் எழுதுதல் வழிக் கற்பவர்கள் ஆவர். அகராதிகள், பாடப்புத்தகங்கள், சிறிய குறிப்புகள் மற்றும் மாதிரி வினாத்தாள்களை எழுதிப் பழகுவது இவர்களுக்கு பாடத்தை எளிதில் புரிய வைக்கும்.

ஆசிரியர் நடத்தியதை அப்படியே தங்கள் சொந்த வார்த்தைகளில் சுருக்கி எழுதி பார்க்கும் பழக்கம், இவர்களின் நினைவாற்றலை அதிகப்படுத்தும். மாணவர்கள் எவ்வாறு படித்தால் மனதில் நிற்கும் என்பதைக் கண்டறிந்து, அதற்கேற்பப் படிக்கும் முறையை மாற்றியமைக்க வேண்டும். முழுமையாக ஒரே வழியை மட்டுமே சார்ந்து இருக்காமல், காட்சியாகப் பார்ப்பது, காதால் கேட்பது, எழுதிப் பார்ப்பது என அனைத்து முறைகளிலும் படிக்கலாம்.