பிளஸ் 2 தேர்வில் பள்ளியில் முதலிடம் மற்றும் மாவட்ட அளவில் இரண்டாமிடம் பெற்றவர் இவர்.  சென்னை செங்குன்றம் அடுத்த நல்லூர் ஊராட்சியை சேர்ந்த பிரேமலதாவின் மூத்த மகள் யுவஸ்ரீ (17). இவர் வடகரை அரசு ஆதிதிராவிட நலத் துறை பெண்கள் மேல்நிலைப் பள்ளியில் பிளஸ் 2 படித்தார். கடந்த கல்வி ஆண்டில் முடிந்த பிளஸ் 2 தேர்வில் 1018 மதிப் பெண்கள் பெற்று பள்ளியின் முதல் மாணவியாக தேர்ச்சி பெற்றார்.

மேலும், திருவள்ளூர் மாவட்டத்தில் உள்ள ஆதி திராவிட நலத்துறை மேல்நிலைப் பள்ளி மாணவ, மாணவிகளில் மாவட்ட அளவில் இரண்டாம் இடத்தில் வெற்றி பெற்றார். இரண்டு ஆண்டுகளுக்கு முன் 10ம் வகுப்பு தேர்விலும் 421 மதிப்பெண்கள் பெற்று, மாவட்ட அளவில் இரண்டாமிடத்தில் தேர்ச்சி பெற்றிருந்தார்.

பி.இ., படிக்கும் ஆர்வத்துடன் கல்லூரி கனவுகளை சுமந்த இவருக்கு குறைந்தபட்ச நுழைவுக் கட்டணம், விடுதி கட்டணம் ஆகியவை சேசர்த்து ரூ.25 ஆயிரம் வரை வருகிறது. இதைச் செலுத்த வழியின்றி தவித்து வருகிறார். வறுமையின் காரணமாக, படித்தது போதும்; எங்காவது வேலைக்குப் போ என்கிறார் தாய். ஆனால் யுவஸ்ரீயோ இன்ஜினியரிங் படிப்பை வெற்றிகரமாக முடித்து, தனது குடும்பத்தை தலை நிமிரச் செய்ய வேண்டும் என்ற இலக்குடன் இருக்கிறார்.