சி.பி.எஸ்.இ., கல்வி என்பது பாடங்களை மனப்பாடம் செய்து தேர்வில் எழுதுவதைக் காட்டிலும், ஒரு கருத்தைப் புரிந்துகொண்டு அதை நடைமுறையில் பயன்படுத்துவதற்கு முக்கியத்துவம் அளிக்கும் கல்வி முறையாக உள்ளது.

அறிவியல், கணிதம் உள்ளிட்ட பாடங்களில் அடிப்படைக் கருத்துகளைத் தெளிவாகப் புரிந்து கொள்ளும் வாய்ப்பு மாணவர்களுக்கு கிடைக்கிறது.

பாடப் புத்தகத்துடன் நின்றுவிடாமல், செய்முறைப் பயிற்சி, திட்டப்பணி, செயல்பாடுகள், கலந்துரையாடல் போன்றவற்றின் மூலம் கற்றலை விரிவுபடுத்தும் அணுகுமுறையும் சி.பி.எஸ்.இ. கல்வியில் இடம்பெறுகிறது. இதனால் மாணவர்களின் சிந்தனை, ஆய்வு, பிரச்னைக்குத் தீர்வு காணும் திறன் ஆகியவை வளர வாய்ப்புள்ளது.

நாடு முழுவதும் ஒரே மாதிரியான பாடத்திட்டக் கட்டமைப்பைக் கொண்டிருப்பது இடமாற்றம் செய்யும் குடும்பங்களின் மாணவர்களுக்கு பயனுள்ளதாக இருக்கிறது. மேலும், உயர்கல்விக்கான தேசிய அளவிலான போட்டித் தேர்வுகளை எதிர்கொள்ளும் போது, பள்ளிக் கல்வியில் கற்ற அறிவியல் மற்றும் கணித அடிப்படைகள் மாணவர்களுக்கு உதவக்கூடும்.

முக்கியமாக, “விடை என்ன?” என்பதுடன் “ஏன்?” மற்றும் “எப்படிப் பயன்படுத்தலாம்?” என்ற கேள்விகளையும் மாணவர்கள் கேட்கும் வகையில் கற்றல் அமைவது இதன் முக்கியத்துவங்களில் ஒன்றாகும்.

அதனால், சி.பி.எஸ்.இ. கல்வி ஒரு தேர்வு முறையாக மட்டும் பார்க்கப்படாமல், தொடர்ந்து கற்றுக்கொள்ளும் பழக்கத்தை உருவாக்கும் கல்வி அணுகுமுறையாகவும் பார்க்கப்படுகிறது.

மாறிய தேர்வு முறை


சி.பி.எஸ்.இ., தேர்வு கேள்விகளில் வெறும் மனப்பாடத்தைக் காட்டிலும், கருத்தைப் புரிந்துகொண்டு பயன்படுத்தும் திறனுக்கு முக்கியத்துவம் அதிகரித்து வருகிறது. நடைமுறைச் சூழல், வழக்குக் கேள்விகள், சிக்கல் தீர்க்கும் திறன், உயர்நிலைச் சிந்தனை போன்றவற்றை மதிப்பிடும் வகையிலான கேள்விகளுக்கு சி.பி.எஸ்.இ. முக்கியத்துவம் அளிக்கிறது.

இதனால் மாணவர்களுக்கு ஒரு முக்கியமான செய்தி கிடைக்கிறது: தேர்வுக்காக விடையை மனப்பாடம் செய்வதைவிட, “இந்த அறிவை எங்கே, எப்படி பயன்படுத்தலாம்?” என்று புரிந்துகொள்வது அவசியம்.

புதிய தேர்வு முறை, மதிப்பெண்ணை மட்டும் நோக்கமாகக் கொள்ளாமல் கற்றலைப் புரிதலோடு அணுகும் நோக்கத்தையும் முன்னிலைப்படுத்துகிறது.