ஒரு மருத்துவரின் முன் நிற்பது ஒரு நோய் மட்டுமல்ல; ஒரு மனிதர். அவருடைய வலி, பயம், எதிர்பார்ப்பு, குடும்பத்தின் கவலை எனப் பல விஷயங்கள் அதனுடன் இணைந்திருக்கின்றன. அதனால்தான் மருத்துவக் கல்வி மற்ற பல படிப்புகளிலிருந்து தனித்துவம் பெறுகிறது. உடலைப் பற்றிய அறிவுடன், மனிதரைப் புரிந்துகொள்ளும் திறனையும் அது வளர்க்கிறது.

மருத்துவம் படிக்கும் மாணவர்கள் மனித உடலின் அமைப்பு, உறுப்புகளின் செயல்பாடு, நோய்களின் காரணங்கள், அவற்றைக் கண்டறியும் முறைகள், சிகிச்சை அளிக்கும் வழிகள் எனப் பல்வேறு அறிவியல் பாடங்களைக் கற்கிறார்கள். புத்தகத்தில் படித்த அறிவை நடைமுறையில் பயன்படுத்துவதற்கும் அவர்கள் பயிற்சி பெறுகிறார்கள். ஒவ்வொரு நோயாளியும் ஒரே மாதிரியானவர் அல்ல என்பதையும் மருத்துவக் கல்வி உணர்த்துகிறது.

இந்தப் படிப்பில் நினைவாற்றல் மட்டும் போதாது. ஒரு நோயாளியின் அறிகுறிகளை கவனித்து, அவற்றை ஒன்றோடு ஒன்று தொடர்புபடுத்தி, சரியான காரணத்தைத் தேடும் திறனும் தேவை. அதாவது மருத்துவக் கல்வி ஒரு மாணவனுக்கு அறிவியல் சிந்தனையுடன் பிரச்சினையை அணுகும் பழக்கத்தையும் உருவாக்குகிறது.

மருத்துவத் துறையும் தொடர்ந்து மாறிக்கொண்டிருக்கிறது. புதிய மருந்துகள், நவீன அறுவை சிகிச்சை முறைகள், செயற்கை நுண்ணறிவு, தொலை மருத்துவம், மரபணு ஆய்வுகள் எனப் பல புதிய தொழில்நுட்பங்கள் மருத்துவத்துடன் இணைந்து வருகின்றன. எனவே மருத்துவராகப் படிப்பை முடித்துவிட்டால் கற்றல் முடிந்துவிடுவதில்லை; தொடர்ந்து கற்றுக்கொண்டே இருப்பது இந்தத் துறையின் முக்கியமான பகுதியாகிறது.

அதே நேரத்தில், மருத்துவக் கல்வியின் மையத்தில் மனிதநேயம் இருக்க வேண்டும். நோயாளியிடம் பொறுமையாகப் பேசுவது, அவருடைய அச்சத்தைப் புரிந்துகொள்வது, உண்மையைப் பொறுப்புடன் விளக்குவது போன்ற பண்புகளும் ஒரு நல்ல மருத்துவரின் திறன்களே. அதனால் மருத்துவக் கல்வி என்பது நோயைக் குணப்படுத்தக் கற்றுக்கொள்வது மட்டுமல்ல; மனித வாழ்க்கையின் மதிப்பைப் புரிந்துகொள்வதற்கான கல்வியாகவும் அமைகிறது.

எப்படிப் படிக்கலாம்?


மருத்துவராக வேண்டும் என்ற கனவு கொண்ட மாணவர்கள், முதலில் பிளஸ் 2-ல் இயற்பியல், வேதியியல், உயிரியல் அல்லது தாவரவியல்-விலங்கியல் ஆகிய பாடப்பிரிவுகளைப் படிக்க வேண்டும். அதன் பிறகு இந்தியாவில் எம்.பி.பி.எஸ். (MBBS) உள்ளிட்ட இளநிலை மருத்துவப் படிப்புகளில் சேர்வதற்கான முக்கிய நுழைவுத்தேர்வாக நீட்- யு.ஜி. (NEET -UG) உள்ளது. நீட் தேர்வில் பெறும் மதிப்பெண் மற்றும் அகில இந்திய அளவிலான தரவரிசையை அடிப்படையாகக் கொண்டு மருத்துவக் கல்லுாரிகளில் சேர்க்கை நடைபெறுகிறது.

அரசு மருத்துவக் கல்லுாரிகள், தனியார் மருத்துவக் கல்லுாரிகள் உள்ளிட்ட பல்வேறு நிறுவனங்களில் சேர்க்கைக்கான கலந்தாய்வு முறையும் இடஒதுக்கீட்டு விதிமுறைகளும் உள்ளன. தமிழகத்தில் மருத்துவ மாணவர் சேர்க்கைக்கான விண்ணப்பம் மற்றும் மாநில அளவிலான கலந்தாய்வு, தமிழ்நாடு மருத்துவ மாணவர் சேர்க்கைக் குழுவின் மூலம் நடைபெறுகிறது.

அரசு ஒதுக்கீடு, அகில இந்திய ஒதுக்கீடு உள்ளிட்ட பிரிவுகளின்படி சேர்க்கை நடைமுறை மாறுபடும். எம்.பி.பி.எஸ். படிப்பை முடித்த பிறகு, மருத்துவராகப் பணியாற்றுவதுடன், குறிப்பிட்ட மருத்துவத் துறையில் மேலும் சிறப்பு பெற முதுநிலை மருத்துவப் படிப்புகளையும் தொடரலாம். மருத்துவம் படிக்க விரும்பும் மாணவர்களுக்கு அறிவியல் அறிவுடன், பொறுமை, கவனிப்பு, மனிதநேயம் ஆகிய பண்புகளும் முக்கியம்.

மருத்துவரின் முன் 3 கேள்விகள்


ஒரு நோயாளி மருத்துவரிடம் வந்தால், மருத்துவர் உடனே மருந்துச் சீட்டை எழுதிவிடுவதில்லை. முதலில் சில முக்கியமான கேள்விகளை மனதுக்குள் எழுப்புகிறார்: “என்ன அறிகுறி?” “அதற்கான காரணம் என்ன?” “இதை உறுதி செய்ய இன்னும் என்ன தெரிந்துகொள்ள வேண்டும்?” இதற்குப் பிறகுதான் பரிசோதனை, நோய் கண்டறிதல், சிகிச்சை என அடுத்தடுத்த படிகள் தொடங்குகின்றன. அதனால் மருத்துவம் என்பது “நோய்க்கு மருந்து கொடுப்பது” மட்டும் அல்ல. ஒரு துப்பறியும் நிபுணரைப் போல, கிடைக்கும் அறிகுறிகளில் இருந்து காரணத்தைக் கண்டுபிடிக்கும் அறிவியலும் கூட!