சிங்கம்புணரி
: எஸ்.எஸ்.கோட்டை துவக்கப்பள்ளியில் குடிநீர் வழங்கும் மோட்டார் பழுதடைந்துள்ளதால் சத்துணவு சாப்பிடும் மாணவர்களுக்கு குடிக்க தண்ணீர் இல்லை என சிங்கம்புணரி ஊராட்சி ஒன்றிய கூட்டத்தில் கவுன்சிலர் புகார் செய்தார்.

ஒன்றிய குழு கூட்டம் தலைவர் வாசு தலைமையில் நடந்தது.

விவாதம் வருமாறு:

நாகராஜன் தி.மு.க.,: எஸ்.மாத்தூர்- உடன்பட்டி, முத்தாண்டிபட்டி- மாம்பட்டி, வணங்கா முடிபட்டி காடுகாவலன் கோயில் சந்திப்பு ரோடு மோசமாக பழுதடைந் துள்ளது.

தலைவர் வாசு: எஸ்.மாத்தூர்- உடன்பட்டி ரோடு நபார்டு திட்டத்தில் ரூ 64 லட்சம் மதிப்பீட்டில் அனுமதிக்கப்பட்டுள்ளது. விரைவில் பணி துவங்கும். சுப்பிரமணியன் சுயே.,: எஸ்.எஸ். கோட்டை துவக்கப்பள்ளியில் மோட்டார் பழுதடைந்து மாணவர்களுக்கு குடிக்க தண்ணீர் இல்லை.ஊராட்சி நிர்வாகம் பழுது பார்க்க மறுக்கிறது.

பி.டி.ஓ.,ஜெயராமன்: ஊராட்சியில் நிதி இல்லை. எஸ்.எஸ்.ஏ.,திட்டத்தில் உடனே பழுது பார்க்க ஏற்பாடு செய் வோம்.

நாகராஜன் தி.மு.க.,: சீமைக்கருவேல் மரங்களை அழிக்க உத்தரவிட்டும் அதிகாரிகள் அதில் கவனம் செலுத்தவில்லை.

பி.டி.ஓ., ஜெயராமன்: மரங்களை அகற்ற ,8 ஊராட்சிகள் அனுமதி கேட்டுள்ளது. ஊராட்சிகள் உதவி இயக்குனர் அனுமதி பெற்று செயல்படுத்துவோம்.

சுப்பிரமணியன் சுயே.,: 2 வருடமாக எஸ்.எஸ். கோட்டை பழுதடைந்த தார் ரோடுபற்றி சொல்லியும் மேம்படுத்தவில்லை.ஒன்றிய பொறியாளர்: நபார்டு திட்டத்தில் சேர்ப்போம்.

நல்லையா அ.தி.மு.க.,: ஒன்றிய வளாகத்தில் பொது மக்கள் பயன்பாட்டிற்கு கட்டப்படும் பொது கழிப்பிடப்பணி தாமதப்பட்டுள்ளது.

தலைவர் வாசு: விரைவில் முடிக்க நடவடிக்கை எடுப்போம்.