கடந்த 2022ம் ஆண்டின் செப்டம்பர் காலாண்டில் 7.2 சதவீதமாக இருந்த, நகர்ப்புறங்களில் வசிக்கும் 15 வயது மற்றும் அதற்கு மேல் உள்ளவர்களுக்கான வேலையின்மை விகிதம், இந்த ஆண்டின் அதே காலத்தில் 6.6 சதவீதமாகக் குறைந்துள்ளது என்று நேஷனல் சேம்பில் சர்வே ஆபிஸ் -என்.எஸ்.எஸ்.ஓ., தெரிவித்துள்ளது.நகர்ப்புறங்களில், 15 வயது மற்றும் அதற்கு மேற்பட்ட வயதுடைய பெண்களுக்கான வேலையின்மை விகிதம் இந்த ஆண்டின் ஜூலை-செப்டம்பரில் 8.6 சதவீதமாக குறைந்துள்ளது என்றும், ஒரு ஆண்டிற்கு முன்பு இதே காலாண்டில் 9.4 சதவீதமாக இருந்தது என்றும் குறிப்பிடப்பட்டுள்ளது. முந்தைய ஆண்டுகளில் வேலையின்மை அதிகமாக இருந்ததற்கு, கொரோனா தொற்றின் காரணமாக கடைபிடிக்கப்பட்ட கட்டுப்பாடுகள் முக்கிய காரணம் என்றும் தெரிவிக்கப்பட்டுள்ளது.