மாமல்லபுரம்:
நெம்மேலி அரசு கலை மற்றும் அறிவியல் கல்லுாரிக்கு மாணவியர் விடுதி கட்ட, 5.45 கோடி ரூபாய் நிதி ஒதுக்கீடு செய்யப்பட்டுள்ளது.

மாமல்லபுரம் அடுத்த, நெம்மேலி கிராமத்தில் அரசு கலை மற்றும் அறிவியல் கல்லுாரி உள்ளது. இங்கு, 2,000த்திற்கும் மேற்பட்ட மாணவ - மாணவியர் படித்து வருகின்றனர். இக்கல்லுாரி மாணவ - மாணவியருக்கு விடுதி இல்லாததால், வாடகை கட்டடத்தில் தங்கி படித்து வருகின்றனர். இங்கு, இட நெருக்கடியில் தங்கி உள்ளனர்.

இதனால், மாணவ - மாணவியருக்கு தனித்தனியாக விடுதி கட்டித் தர வேண்டும் என, அரசுக்கு கல்லுாரி நிர்வாகம் பரிந்துரை செய்தது.

தொடர்ந்து மாணவியர் விடுதி கட்ட 1 ஏக்கர் நிலமும், மாணவர்கள் விடுதி கட்ட 0.50 சென்ட் நிலமும் ஒதுக்கீடு செய்து, கல்வித் துறைக்கு வருவாய் துறை வழங்கியது.இதை தொடர்ந்து, 100 மாணவியர் தங்கி படிக்கும் வகையில் நபார்டு திட்டத்தில், மாணவியர் விடுதி கட்ட 5 .45 கோடி ரூபாய் ஒதுக்கீடு செய்து, அரசு உத்தரவிட்டுள்ளது.

தற்போது விடுதி கட்ட டெண்டர் விடப்பட்டுள்ளது. பணிகள் விரைவில் துவங்கப்பட உள்ளன. மேலும், மாணவர்கள் விடுதி கட்ட திட்ட அறிக்கை தயார் செய்யும் பணி நடந்து வருவதாக கல்லுாரி நிர்வாகம் தெரிவித்துள்ளது.