மதுரை:
மதுரையில் கட்டப்பட்டு வரும் எய்ம்ஸ் மருத்துவமனையின் 3டி வீடியோவை மத்திய அரசு வெளியிட்டது.

மதுரை தோப்பூரில் 220 ஏக்கரில் எய்ம்ஸ் மருத்துவமனையின் கட்டுமான பணி 2024 மே 22ல் துவங்கியது. 2019ல் மருத்துவனை கட்ட அடிக்கல் நாட்டப்பட்டது. கட்டுமான திட்டத்தின் மதிப்பு ரூ.2021 கோடி. இரண்டு கட்டங்களாக கட்டுமானம் கட்ட முடிவெடுக்கப்பட்டுள்ளது.

முதல் கட்டமாக கல்வி வளாகம், புறநோயாளிகள் பிரிவு, மாணவர்கள் விடுதி, அலுவலக கட்டடங்கள் கட்டப்பட உள்ளது. முதல் கட்டப் பணி 2026ம் ஆண்டிலும், 2ம் கட்டப் பணி 2027ம் ஆண்டிலும் முடியும் என தகவல் வெளியாகி உள்ளது. 900 படுக்கைகள், ஹெலிகாப்டர் தளம், குறுங்காடு போன்றவை எய்ம்ஸ் மருத்துவமனையில் அமைக்கப்பட திட்டமிடப்பட்டு உள்ளது.

இந்நிலையில், இன்று (ஜூன் 17) மதுரையில் கட்டப்பட்டு வரும் எய்ம்ஸ் மருத்துவமனையின் 3டி வீடியோவை மத்திய அரசு வெளியிட்டது. வீடியோவில் மருத்துவமனை எப்படி இருக்கும் என்பது தெளிவாக விளக்கப்பட்டு உள்ளது. இந்த வீடியோ இணையத்தில் அதிகம் பகிரப்பட்டு வருகிறது.

இந்த ஒரு வீடியோ போதுமா?

இது குறித்து முதல்வர் ஸ்டாலின் வெளியிட்டுள்ள பதிவில் கூறியிருப்பதாவது:


மதுரைக்கு வந்த மத்திய உள்துறை அமைச்சர் எய்ம்ஸ் என்ன ஆனது எனச் சென்று பார்த்தாரா? எனக் கேட்டிருந்தேன்.

அதற்குப் பதிலாக, இந்த 3டி வீடியோவை உருவாக்கி அளித்துள்ளார்கள். 2026 தேர்தலுக்கு இந்த ஒரு வீடியோ போதும் என நினைத்துவிட்டார்களா? இதற்கே 10 ஆண்டுகள் ஆகியிருக்கின்றன.

இவ்வாறு முதல்வர் ஸ்டாலின் கூறியுள்ளார்.