பீகாரில் கங்கை ஆற்றில் படகு கவிழ்ந்து பயங்கர விபத்து: குழந்தைகள் உட்பட 13 பேர் பலி; பிரதமர் மோடி இரங்கல்
பீகாரில் கங்கை ஆற்றில் படகு கவிழ்ந்து பயங்கர விபத்து: குழந்தைகள் உட்பட 13 பேர் பலி; பிரதமர் மோடி இரங்கல்
UPDATED : அக் 14, 2026 07:06 AM
ADDED : அக் 13, 2026 10:45 PM

பாட்னா: பீகார் மாநிலம் வைசாலி அருகே கங்கை ஆற்றில் படகு கவிழ்ந்த கோர விபத்தில், குழந்தைகள் உட்பட 13 பேர் பரிதாபமாக உயிரிழந்தனர். இந்த விபத்துக்கு பிரதமர் மோடி ஆழ்ந்த இரங்கல்களை தெரிவித்துள்ளார்.
பீகார் மாநிலம், வைசாலி மாவட்டத்திற்கு உட்பட்ட ராகோபூர் தியாரா பகுதியில் உள்ளூர் விருந்து நிகழ்ச்சியில் பங்கேற்பதற்காக சுமார் 15 முதல் 20 பேர் ஒரு நாட்டுப் படகில் கங்கை ஆற்றைக் கடந்து சென்று கொண்டிருந்தனர். நடு ஆற்றில் சென்று கொண்டிருந்தபோது, எதிர்பாராதவிதமாக படகு நிலைதடுமாறி ஆற்றில் கவிழ்ந்தது. இதில் படகில் பயணம் செய்த அனைவரும் தண்ணீரில் மூழ்கி கூச்சலிட்டனர்.
மீட்புப் பணி:
தகவலறிந்து சம்பவ இடத்திற்கு விரைந்து வந்த தேசிய பேரிடர் மீட்புப் படையினர் மற்றும் உள்ளூர் போலீசார், கிராம மக்களின் உதவியுடன் தீவிர மீட்புப் பணியில் இறங்கினர். எனினும், ஆற்று நீரில் மூழ்கி குழந்தைகள் உட்பட 13 பேரின் உடல்கள் மீட்கப்பட்டுள்ளன. மேலும் மாயமானவர்களைத் தேடும் பணி முழுவீச்சில் நடைபெற்று வருகிறது.
நிவாரண நிதி:
இந்த விபத்துக்கு ஆழ்ந்த இரங்கல் தெரிவித்துள்ள பிரதமர் நரேந்திர மோடி, உயிரிழந்தவர்களின் குடும்பங்களுக்கு பிரதமரின் தேசிய நிவாரண நிதியிலிருந்து தலா ரூ.2 லட்சமும், காயமடைந்தவர்களுக்கு ரூ.50 ஆயிரமும் வழங்கப்படும் என அறிவித்துள்ளார்.
இதேபோல், மாநில அரசு சார்பில் உயிரிழந்தவர்களின் குடும்பங்களுக்கு தலா ரூ.4 லட்சம் நிவாரண உதவி வழங்கப்படும் என பீகார் அரசு அறிவித்துள்ளது. மேலும் காயமடைந்தவர்களுக்கு உரிய சிகிச்சை வழங்க அதிகாரிகளுக்கு உத்தரவிடப்பட்டுள்ளது. விபத்து குறித்து போலீசார் தீவிர விசாரணை நடத்தி வருகின்றனர்.
