இது குறித்து ஆங்கில நாளிதழுக்கு உதயநிதி அளித்த பேட்டி: நீண்ட காலமாக எங்கள் பிரதான போட்டியாளராக அதிமுக இருந்தாலும், இப்போதைய நிலையில் பலம் வாய்ந்த போட்டியாளர் யாரும் இருப்பதாக நான் கருதவில்லை. பலவீனமான நிலையில் அதிமுக இருந்தாலும், அதைத்தான் பிரதான எதிர்க்கட்சியாக நாங்கள் பார்க்கிறோம். அவர்கள் தான் எங்களது போட்டியாளர்.

தயார்

நாங்கள் பாஜ கட்சியையும் அதன் அனைத்து பி டீம்களையும் எதிர்கொள்ள தயாராக இருக்கிறோம். தமிழகத்தில் மதசார்பற்ற சக்திகளை பலவீனப்படுத்த பாஜ அனைத்து வழிகளையும் பயன்படுத்தும் என்பதை அறிந்தே இருக்கிறோம். தமிழக மக்கள் பாஜவின் சதியை அறிந்து அதை தோற்கடிப்பர். எங்கள் கூட்டணியில் ஒவ்வொரு கட்சியையும் திமுக மதித்து அவர்களது கருத்துகளை உள்வாங்கி கொள்கிறது. எங்கள் கூட்டணி பரஸ்பரம், மரியாதை தரக்கூடியது.

முக்கியத்துவம்

தேஜ கூட்டணியில் முடிவுகள் அனைத்து டில்லியில் எடுக்கப்பட்டு தமிழக கட்சிகளின் மீது திணிக்கப்படுகிறது. கட்சி தலைவர் ஸ்டாலின் திமுக இளைஞர் அணியை துவக்கி நீண்டகாலம் வழிநடத்தியவர். அந்தவகையில் இளைஞர்களுக்கு அதிகாரத்தை கொடுத்து எதிர்காலத்திற்கு அவர்களை தயார்படுத்துவதன் முக்கியத்துவத்தை அவர் புரிந்தே இருக்கிறார். கட்சியின் அனைத்து அமைப்புகளிலும் இளைஞர்களுக்கு முக்கியத்துவம் கிடைக்க நான் குரல் கொடுப்பேன். இவ்வாறு உதயநிதி கூறினார்.