டில்லியில் நடந்த காங்கிரஸ் செயற்குழு கூட்டத்தில் பங்கேற்ற பிறகு நிருபர்களிடம் ராகுல் கூறியதாவது: மஹாத்மா காந்தி தேசிய ஊரக வேலைவாய்ப்பு உறுதித் திட்டம் என்பது வெறும் ஒரு திட்டம் மட்டுமல்ல; அது உரிமைகள் அடிப்படையாக கொண்டது. இப்போது தாக்குதலுக்கு உள்ளாகியுள்ளது.

இறுதியாக, சம்பந்தப்பட்ட அமைச்சர்களையோ அல்லது அமைச்சரவையையோ கலந்து ஆலோசிக்காமல், இந்த முடிவு நேரடியாகப் பிரதமரின் அலுவலகத்தால் எடுக்கப்பட்டது என்று எனக்குத் தெரிவிக்கப்பட்டுள்ளது. இது தற்போதைய சூழ்நிலையைப் பிரதிபலிக்கிறது. அங்கு ஆட்சி என்பது ஒரு தனி மனிதரின் கையாக மாறியுள்ளது. மேலும் நரேந்திர மோடி விரும்புவது எதுவோ அதுவே செயல்படுத்தப்படுகிறது.

இது பணமதிப்பிழப்பு நடவடிக்கையைப் போலவே, மாநிலங்கள் மற்றும் ஏழை மக்கள் மீது நடத்தப்பட்ட ஒரு பேரழிவுத் தாக்குதல்.100 நாள் வேலைத் திட்டத்தில் மாற்றம் கொண்டு வந்ததால், முழுப் பலனும் இரண்டு அல்லது மூன்று கோடீஸ்வரர்களுக்கு மட்டுமே செல்லும். இந்தத் திட்டம் தோல்வியடையும் என்பதை நீங்கள் காண்பீர்கள்.

உரிமைகள் அடிப்படையிலான கட்டமைப்பு சரிந்துவிடும். இது கிராமப்புறப் பொருளாதாரத்திற்குத் தீங்கு விளைவிக்கும். மஹாத்மா காந்தி தேசிய ஊரக வேலைவாய்ப்பு உறுதித் திட்டத்தை ரத்து செய்வது, உரிமைகள் அடிப்படையிலான அணுகுமுறை மற்றும் கூட்டாட்சி அமைப்பு மீதான தாக்குதல் ஆகும். இவ்வாறு ராகுல் கூறினார்.

அவமதிப்பதாகும்!

காங்கிரஸ் தலைவர் மல்லிகார்ஜுன கார்கே கூறியதாவது: பாஜ அரசு 100 நாள் வேலை திட்டத்தை ரத்து செய்துள்ளது. இதனால் கோடிக்கணக்கான ஏழை மக்கள் பாதிக்கப்பட்டுள்ளனர். இந்த திட்டத்தை ஒழிப்பது மஹாத்மா காந்தியை அவமதிப்பதாகும்.

கடந்த 76 ஆண்டுகளில், எந்தவொரு சர்வாதிகாரியாலும் இந்த நாட்டின் குடிமக்களின் உரிமைகளைப் பறிக்க முடியாது என்பதை அரசியலமைப்புச் சட்டம் போதுமான அளவு கற்றுக் கொடுத்துள்ளது.

மஹாத்மா காந்தி தேசிய ஊரக வேலைவாய்ப்பு உறுதித் திட்டம் குறித்து உறுதியான திட்டங்களைத் தீட்டுவதும், நாடு தழுவிய மக்கள் பிரசாரத்தைத் தொடங்குவதும் நமது கூட்டுப் பொறுப்பாகும். இவ்வாறு கார்கே கூறினார்.