வலியுறுத்தல்

ஆர்.எஸ்.எஸ்., அணிவகுப்பில், அ.தி.மு.க., முன்னாள் அமைச்சர் தளவாய் சுந்தரம் பங்கேற்றதால், அவர் வகித்த அமைப்புச் செயலர், கன்னியாகுமரி கிழக்கு மாவட்டச் செயலர் பதவியை, அ.தி.மு.க., தலைமை பறித்தது.

இதற்கு, பா.ஜ., -- ஆர்.எஸ்.எஸ்., மற்றும் ஹிந்து அமைப்புகள் கண்டனம் தெரிவித்தன. கட்சித் தலைமை பதவியை பறித்ததால், அடுத்தகட்ட நடவடிக்கை குறித்து, கன்னியாகுமரியில் தளவாய் சுந்தரம் தன் ஆதரவாளர்களிடம் ஆலோசனை நடத்தி வருகிறார்.

பா.ஜ., டில்லி மேலிடத் தலைவர் ஒருவரும், ஹிந்து ஆன்மிக நிறுவனமான விவேகானந்தா கேந்திரா அமைப்பைச் சேர்ந்த முக்கிய தலைவரும், தளவாயை பா.ஜ.,வில் சேர, அழைப்பு விடுத்து உள்ளனர். எம்.எல்.ஏ., பதவியை ராஜினாமா செய்துவிட்டு, பா.ஜ.,வில் இணைந்தால், அடுத்த ஆண்டில் அவருக்கு கவர்னர் பதவி வழங்குவதாக தெரிவித்து உள்ளனர்.

அதேபோல் தி.மு.க.,வில் இணைந்தால், இடைத்தேர்தல் நடத்தி அவரை அமைச்சராக்குவதாக, முதல்வரின் குடும்ப உறுப்பினருக்கு நெருக்கமான ஐ.ஏ.எஸ்., அதிகாரி தரப்பில் பேசியுள்ளனர்.

நல்ல முடிவெடுப்பார்

தாதுமண் தொழில் அதிபர் ஒருவர், பா.ஜ.,வில் இணையும்படி வலியுறுத்தி உள்ளார். இதை அறிந்த அ.தி.மு.க., இரண்டாம் கட்டத் தலைவர்கள், வேறு கட்சிக்கு செல்லும் முடிவை எடுக்க வேண்டாம்; பொறுமையாக இருங்கள் என தளவாய் சுந்தரத்திடம் கூறியுள்ளனர்.

இது குறித்து, தளவாய் சுந்தரத்துக்கு நெருக்கமான ஒருவர் கூறுகையில், 'தளவாய்க்கு சட்டக் கல்லுாரியில் 'சீட்' கிடைக்க எம்.ஜி.ஆர்., உதவி புரிந்துள்ளார். ராஜ்யசபா எம்.பி., அமைச்சர் பதவிகளை ஜெயலலிதா வழங்கினார். 'டில்லி பிரதிநிதி பதவியை பழனிசாமி வழங்கினார். எனவே, அவர் அ.தி.மு.க.,வை விட்டு வெளியேற ரொம்பவும் யோசிக்கிறார்; விரைவில் நல்ல முடிவெடுப்பார்' என்றார்.

- நமது நிருபர் -