திருவாரூரில், நேற்று அவர் அளித்த பேட்டி: திருவாரூர் மாவட்டம், திருக்கரவாசல் கண்ணாயிரம் நாதர் கோவிலில் இருந்த, மரகத லிங்க மூலவர் திருமேனி திருடு போய், 33 ஆண்டுகள் ஆகின்றன. கடந்த, 2009ல், மரகத லிங்க சிலையை கண்டுபிடித்து விட்டதாக, இன்ஸ்பெக்டர் ஒருவர், போலியான சிலையை கோவில் நிர்வாகத்திடம் ஒப்படைத்தார்.

காவலாளி, கோவில் ஆய்வாளர்களை துன்புறுத்தி, பொய்யான சிலையை உண்மையான சிலை என, ஒப்புக்கொள்ள வைத்தார். இதனால், மனமுடைந்த காவலாளி கோவிந்தன் தற்கொலை செய்து கொண்டார். அர்ச்சகரும் மனவேதனையில் இறந்தார்.

சிலை திருட்டு தடுப்பு இன்ஸ்பெக்டர் மேல் எழுந்த குற்றச்சாட்டு அடிப்படையில், சி.பி.சி.ஐ.டி., போலீசார் விசாரித்ததில், மரகத லிங்க சிலை போலியானது என, உறுதி செய்யப்பட்டது. மேலும், இன்ஸ்பெக்டர் போட்ட வழக்கு, பொய் வழக்கு என, விழுப்புரம் நீதித்துறை நடுவர் நீதிமன்றம், 2023ல், தீர்ப்பளித்தது.

மரகதலிங்க சிலை யாரால் திருடப்பட்டது என, இப்போது வரை கண்டறியப்படவில்லை. டி.ஜி.பி., நடவடிக்கை எடுத்து, உண்மையான சிலையை கண்டுபிடித்து, கோவிலுக்கு வழங்க வேண்டும். இறந்து போன காவலாளி மற்றும் அர்ச்சகர் குடும்பத்திற்கு, அரசு தலா, 10 லட்சம் ரூபாய் நிவாரணம் வழங்க வேண்டும். இவ்வாறு கூறினார்.