சத்துணவு ஊழியர்கள்

சத்துணவுத் துறையில் அமைப்பாளர்கள், சமையல் உதவியாளர்கள் என, 80,000க்கும் மேற்பட்ட ஊழியர்கள் பணிபுரிகின்றனர். காலமுறை ஊதியம் உள்ளிட்ட பல்வேறு கோரிக்கையை வலியுறுத்தி, தமிழ்நாடு சத்துணவு அங்கன்வாடி சங்கங்களின் கூட்டமைப்பு சார்பில், நேற்று முதல் அங்கன்வாடி மையங்களை மூடி, பணியாளர்கள் காலவரையற்ற வேலை நிறுத்த போராட்டத்தில் ஈடுபட்டுள்ளனர். மேலும், தமிழகம் முழுதும், மாவட்ட தலைநகரங்களில் ஆர்ப்பாட்டத்தில் ஈடுபட்டனர்.
சென்னையில், கலெக்டர் அலுவலகம் அருகே, சங்க ஒருங்கிணைப்பாளர் அமுதா தலைமையில், 350க்கும் மேற்பட்ட ஊழியர்கள் ஆர்ப்பாட்டத்தில் ஈடுபட்டனர். தங்களின் கோரிக்கைகளை பாடலாகப் பாடினர். அதன்பின் ராஜாஜி சாலையில் அமர்ந்து மறியலில் ஈடுபட்டனர். அவர்களைப் போலீசார் கைது செய்தனர். வேலை நிறுத்தப் போராட்டத்தில் பங்கேற்காத பணியாளர்கள், அருகில் உள்ள மையங்களில் படிக்கும் குழந்தைகளுக்கும், உணவு சமைத்து வழங்கினர். மேலும், காலை உணவு திட்டத்தின் கீழும், அங்கன்வாடி மையங்களுக்கு உணவு வழங்கப்பட்டது.