வாக்காளர் பட்டியல் குறித்து விவாதம் நடத்த கோரி, எதிர்க்கட்சிகளின் அமளியால், ராஜ்யசபா நேற்று மதியம் வரை ஒத்தி வைக்கப்பட்டது.

மதியம் மீண்டும் கூடியதும், கடலோர கப்பல் போக்குவரத்து மசோதா மீதான விவாதம் துவங்கியது. எதிர்க்கட்சிகள் அமளியில் ஈடுபட்டன. இதற்கு மத்தியில், அ.தி.மு.க., - எம்.பி., தம்பிதுரை பேசினார்.

அவர் கூறியதாவது:

கடலுக்கு மீன் பிடிக்கச் செல்லும் தமிழக மீனவர்கள் கைது செய்யப்படுவது வாடிக்கையாக உள்ளது. கடந்த 1974ல், அப்போதைய காங்கிரஸ் மற்றும் தி.மு.க., அரசுகள் இணைந்து, கச்சத்தீவை, கூட்டுச் சதி செய்து, இலங்கைக்கு தாரை வார்த்ததே இதற்கு காரணம்.

இந்தியா - இலங்கை இடையே, 1972 மற்றும் 1974ம் ஆண்டுகளில் போடப்பட்ட இரு ஒப்பந்தங்களுமே சட்ட விரோதமானவை. இந்த வரலாற்றுத் தவறை சரி செய்யும் வகையில், கச்சத்தீவை மீட்க மத்திய அரசு நடவடிக்கை எடுக்க வேண்டும்.

இவ்வாறு அவர் கூறினார்.

அதற்கு, தி.மு.க., - எம்.பி.,க்கள் எதிர்ப்பு தெரிவித்து, 'தம்பிதுரை கூறிய கருத்துகளை, சபை குறிப்பிலிருந்து நீக்க வேண்டும்' என்றனர்.

பதிலுக்கு அ.தி.மு.க., - பா.ஜ., - எம்.பி.,க்கள் இணைந்து எதிர்ப்பு குரல் கொடுத்தனர். இந்த களேபரத்துக்கு இடையே, கடலோர கப்பல் போக்குவரத்து மசோதா நிறைவேற்றப்பட்டது.

- நமது டில்லி நிருபர் -