தமிழக அரசு போக்குவரத்துக் கழகத்தில், 2018ம் ஆண்டு முதல் ஓய்வு பெற்றவர்கள் அகவிலைப்படியை திருத்தக் கோரி, சட்டப்போராட்டத்தை நடத்தி வருகின்றனர்.

தமிழக அரசு தொடர்ந்த பல வழக்குகளை, உச்ச மற்றும் உயர் நீதிமன்றங்கள் தள்ளுபடி செய்துள்ளன. அதன் பின்னரும், அரசு தொடர்ந்து ஓய்வூதியர்களுக்கு அகவிலைப்படியை திருத்தம் செய்யக்கூடாது என்ற நோக்கில், மனுக்களை தாக்கல் செய்து வருகிறது. இது ஓய்வூதியர்கள் மத்தியில் அதிருப்தியை ஏற்படுத்தியுள்ளது.

அரசு போக்குவரத்துக்கழக ஓய்வு பெற்ற ஊழியர் ஒருவர் கூறியதாவது:ஓய்வூதியதாரர்களுக்கு, 54 சதவீதம் வரை அகவிலைப்படி வழங்க வேண்டும். ஆனால், 2016 முதல் அரசு, 5 சதவீதம் மட்டுமே வழங்கி வருகின்றனர். 7வது ஊதியக்குழு அமல்படுத்துவதற்கு முன், ஓய்வு பெற்ற ஊழியர்களுக்கு, 239 சதவீதம் அகவிலைப்படி வழங்கப்பட வேண்டும். ஆனால் அது, 119 சதவீதமாக மட்டுமே உள்ளது.

நீண்ட சட்ட போராட்டம்

மாற்றங்கள் இல்லாததால், 2018ல், சென்னை உயர்நீதிமன்ற மதுரை கிளையில், ரிட் மனு தாக்கல் செய்தோம். நீதிமன்றம், 2019ல் எங்களுக்கு ஆதரவாக தீர்ப்பளித்தது. குறிப்பிட்ட கால இடைவெளியில், திருத்தம் செய்யப்பட்ட அகவிலைப்படியை விடுவிக்க, டி.என்.எஸ்.டி.சி.,ன் ஓய்வூதிய அறக்கட்டளைக்கு உத்தரவிட்டது. இதை நிறைவேற்றாததால், 2019 பிப்ரவரியில் நீதிமன்ற அவமதிப்பு மனு தாக்கல் செய்யப்பட்டது. இதிலும் எங்களுக்கு சாதகமாக தீர்ப்பு வந்தது. இந்நிலையில், அரசு 2019 அக்டோபரில் அரசு இயற்றிய அரசாணை, 142 ல் அனைத்து ஓய்வூதியதாரர்களுக்கும், ஐந்து சதவீத அகவிலைப்படியை முடக்கியது.

இதை எதிர்த்து வழக்கு தொடரப்பட்டது. எங்களுக்கு சாதகமாக, 2023ல் தீர்ப்பு கிடைத்தது. இதை நிறைவேற்றாததால், 2023 ஏப்ரலில் நீதிமன்ற அவமதிப்பு மனு தாக்கல் செய்தோம். அதிலும் எங்களுக்கு ஆதரவாக தீர்ப்பு கிடைத்தது.

8 ஆண்டுகளில் வழக்குக்காக ரூ.80 லட்சம் செலவு

பல ஓய்வூதியர்கள் உயிரிழப்பு இதை எதிர்த்து ஓய்வூதிய அறக்கட்டளை, 2023ல் உயர்நீதிமன்றத்தில் மறு சீராய்வு மனுவை தாக்கல் செய்தது. இதுவும் தள்ளுபடி செய்யப்பட்டது. இதன் பின், ஓய்வூதிய அறக்கட்டளை, மாநில அரசுடன் சேர்ந்து 2023 டிசம்பரில், சிறப்பு விடுப்பு மனு தாக்கல் செய்தது. அவையும் நிராகரிக்கப்பட்டன.

அரசு தரப்பில் தாக்கல் செய்யப்பட்ட சீராய்வு மனுவும், கடந்த சனிக்கிழமை தள்ளுபடி செய்யப்பட்டது. தற்போது அரசு உச்ச நீதிமன்றத்தின் இறுதித்தீர்ப்பை, மறு ஆய்வு செய்வதற்காக (கியூரேட்டிவ் பெட்டிஷன்), மனு தாக்கல் செய்துள்ளது. எங்களுக்கு எந்த பலன்களையும் தரக்கூடாது என, அரசு நடவடிக்கைகளை மேற்கொள்கிறது.

இதுவரை எங்கள் ஓய்வூதியத்தில் இருந்து, நன்கொடை பெற்று 80 லட்சம் ரூபாய் வரை சட்ட போராட்டங்களுக்காக செலவழித்து விட்டோம். தீர்வு காண்பதாக, தேர்தல் வாக்குறுதி கொடுத்த தி.மு.க., அரசு, அதை மறந்தே போனது.

இவ்வாறு, அவர் கூறினார்.