கரூர் வேலுச்சாமிபுரத்தில் கடந்த, 27ம் தேதி இரவு, த.வெ.க., தலைவர் விஜய் பிரசாரம் மேற்கொண்டார். அப்போது கூட்ட நெரிசலில் சிக்கி குழந்தைகள், பெண்கள் உட்பட, 41 பேர் இறந்தனர், 100க்கும் மேற்பட்டவர்கள் காயமடைந்தனர்.

இந்நிலையில், பா.ஜ.,- எம்.பி., ஹேமமாலினி தலைமையிலான தேசிய ஜனநாயக கூட்டணி உண்மை கண்டறியும் ஆய்வுக் குழு, கரூரில் நேரடியாக விசாரணை நடத்தும் என அறிவிக்கப்பட்டது

இதில் எம்.பி.,க்கள் அனுராக் தாக்கூர், தேஜஸ்வி சூர்யா, முன்னாள் டி.ஜி.பி.,யான பிரஜ் லால், சிவசேனா கட்சியின் ஸ்ரீகாந்த் ஷிண்டே, அப்ரஜிதா சாரங்கி, ரேகா ஷர்மா, தெலுங்கு தேசம் கட்சியின் புட்ட மகேஷ் குமார் ஆகியோர் இடம் பெற்றுள்ளனர்.

இக்குழுவினர் நேற்று கரூருக்கு வந்தனர். வேலுச்சாமிபுரத்தில் ஆய்வு மேற்கொண்டனர். பின், கரூர் அரசு மருத்துவக்கல்லுாரி மருத்துவமனையில், காயமடைந்தவர்களுக்கு ஆறுதல் கூறினர்.

இதன் பின், ஹேமமாலினி அளித்த பேட்டி:

பாதிக்கப்பட்ட அனைத்து குடும்பங்களையும், தனித்தனியாக சந்தித்து ஆறுதல் தெரிவித்தோம். ஒவ்வொரு குடும்பத்தினரிடமும் தனித்தனியாக பேசி, அவர்களுடைய கருத்துக்களை பதிவு செய்து கொண்டோம்.

விஜய் பிரசார கூட்டத்தின் போது பலி சம்பவம் குறித்து, உண்மையில் என்ன நடந்தது என்பதை கண்டறியவே குழுவாக வந்துள்ளோம். நடிகர் விஜயை பார்க்கவே பெண்கள், சிறுமியர் என பலரும் வந்துள்ளனர். பெரிய நடிகர் ஒருவரின் பிரசாரக் கூட்டத்திற்கு குறுகிய சாலையில் இடம் கொடுத்துள்ளனர்.

அது சரியான அணுகுமுறை அல்ல. கரூரில் விஜய் பிரசாரத்தில் ஈடுபட்ட போது, அந்தப் பகுதி முழுதும் மின்தடை ஏற்படுத்தப்பட்டுள்ளது. அதை வைத்துப் பார்க்கும்போது, நடந்த சம்பவங்கள் அனைத்தும் இயற்கையானது போல், தெரியவில்லை.

நடிகர் விஜய் பேசுவதற்கு, பெரிய இடத்தில் அனுமதி கொடுத்திருந்தால், இப்படிப்பட்ட சம்பவம் நடந்திருக்காது.

நடந்த சம்பவத்திற்கு யார் பொறுப்பு ஏற்பது. குறுகலான இடத்தை தேர்வு செய்து, மாவட்ட நிர்வாகம் அங்கே பிரசாரம் நடத்த எப்படி அனுமதி கொடுத்தது என புரியவில்லை.

என்ன நடந்தது என்பது குறித்த அனைத்து தகவல்களையும் சேகரித்துள்ளோம். உச்ச நீதிமன்ற நீதிபதி விசாரணை தேவை. இவ்வாறு அவர் கூறினார்.