ADDED : ஜூன் 17, 2026 05:30 PM
புதுச்சேரி: புதுச்சேரியில் சைபர் மோசடி கும்பலிடம் 5 பேர் ரூ. 1.95 லட்சம் இழந்துள்ளனர்.
கணபதிசெட்டிக்குளத்தை சேர்ந்த ஜவுளிக்கடை உரிமையாளர், இன்ஸ்டாகிராமில் குறைந்த விலைக்கு ஆடை விற்பனை தொடர்பான விளம்பரத்தை பார்த்து, அவற்றை ஆர்டர் செய்தார். இதையடுத்து, அவரை தொடர்பு கொண்ட மர்மநபர் முன்பணம் செலுத்தும்படி தெரிவித்துள்ளார். அதைநம்பி மர்மநபருக்கு ரூ. 1 லட்சத்து 78 ஆயிரம் செலுத்தினார். ஆனால், ஆர்டர் செய்த பொருட்கள் வீட்டிற்கு வரவில்லை. அதன்பின் அந்த மர்மநபரையும் தொடர்பு கொள்ள முடியவில்லை.
இதேபோல், கருவடிக்குப்பத்தை சேர்ந்தவர் 4 ஆயிரத்து 500, அரும்பார்த்தபுரத்தை சேர்ந்தவர் 9 ஆயிரத்து 800, கொசப்பாளையத்தை சேர்ந்த பெண் 2 ஆயிரத்து 200, பெரிய காலாப்பட்டை சேர்ந்தவர் 500 என, 5 பேர் சைபர் மோசடி கும்பலிடம் ரூ. 1 லட்சத்து 95 ஆயிரம் ரூபாய் இழந்துள்ளனர்.
புகார்களின் பேரில், சைபர் கிரைம் போலீசார் வழக்குப் பதிந்து விசாரித்து வருகின்றனர்.
