சட்டம் ஒழுங்கு சீனியர் எஸ்.பி.யாக பொறுப்பேற்ற கலைவாணன், புதுச்சேரியில் நடக்கும் சட்ட விரோத லாட்டரி சீட்டு விற்பனையை ஒழிக்க சிறப்பு அதிரடிப்படைக்கு உத்தரவிட்டார்.

இதைத் தொடர்ந்து, சிறப்பு அதிரடிப்படை இன்ஸ்பெக்டர்கள் கார்த்திகேயன், கணேஷ் தலைமையிலான போலீசார் கடந்த 2 நாட்களாக புதுச்சேரி முழுதும் திடீர் சோதனையில் இறங்கினர்.

இதில் நேற்று முன்தினம் வில்லியனுார், கோரிமேடு மேட்டுப்பாளையம் உள்ளிட்ட பகுதியில் தடை செய்யப்பட்ட லாட்டரி சீட்டு விற்பனை செய்த 11 பேர் கைது செய்யப்பட்டனர். அவர்களிடம் இருந்து ரூ. 1.20 லட்சம் பணமும், 8 மொபைல்போன் பறிமுதல் செய்யப்பட்டது.

2வது நாளான நேற்று உருளையன்பேட்டை போலீஸ் நிலையம் அருகே மறைமலையடிகள் சாலை மேம்பாலம் அருகே லாட்டரி சீட்டு விற்ற, நெல்லித்தோப்பு ஒத்தவடை வீதியைச் சேர்ந்த ராமராஜ், 60; என்பவரை கைது செய்தனர். ராமராஜிடம் இருந்து ரூ.75 ஆயிரம் மதிப்புள்ள 3 நம்பர் லாட்டரி மற்றும் கேரளா உள்ளிட்ட வெளிமாநில லாட்டரி சீட்டுகள், 1 மொபைல் போன், ரூ. 7000 பணத்தை பறிமுதல் செய்தனர். இரு நாட்களில் மொத்தம் 8 வழக்கு களில் 12 பேர் கைது செய்யப்பட்டு, ரூ. 1.27 லட்சம் பறிமுதல் செய்யப்பட்டது.

சீனியர் எஸ்.பி., கலைவாணன் கூறுகையில்; லாட்டரி சீட்டு விற்பனை கும்பலின் முக்கிய குற்றவாளியான முத்தியால்பேட்டை சரவணன் தலைமறைவாக உள்ளார். சட்ட விரோத லாட்டரி விற்பனை குறித்து தகவல் தெரிந்தால் பொதுமக்கள் புகார் தெரிவிக்கலாம் என கூறினார்.