மதகடிப்பட்டில் மத்திய அரசு தொல்லியல் துறையின் கட்டுப்பாட்டில் பிரசித்திப்பெற்ற அகிலாண்டேஸ்வரி சமேத குண்டான் குழி மகாதேவர் கோவில் உள்ளது.

இக்கோவிலுக்கு சமீபத்தில் புதிதாக வந்துள்ள சிவகாமசுந்தரி சமேத நடராஜர் சுவாமி சிலைக்கு கடந்த 29ம் தேதி மாலை 4:00 மணிக்கு கரிக்கோல விழா நடந்தது.

கோவிலில் நேற்று முன்தினம் ஆருத்ரா தரிசன விழா நடந்தது. விழாவையொட்டி, காலை 5:00 மணிக்கு நடராஜர், சிவகாமசுந்தரி சுவாமிகளுக்கு சிறப்பு அபிஷேக ஆராதனை நடந்தது. அதில் மஞ்சள், பால், தயிர், இளநீர், சந்தனம், பஞ்சாமிர்தம் ஆகியவற்றால் அபிஷேகம் நடந்தது.

தொடர்ந்து சுவாமிகளுக்கு அலங்காரம் செய்யப்பட்டு சிறப்பு பூஜை, தீபாராதனை நடந்தது. காலை 8:00 மணிக்கு குண்டான்குழி மகாதேவர் கோவிலில் இருந்து மேளதாளங்கள் முழங்க சுவாமி வீதியுலா நடந்தது. ஏராளனமான பக்தர்கள் தரிசனம் செய்தனர். விழா ஏற்பாடுகளை மதகடிப்பட்டு கிராம மக்கள் செய்திருந்தனர்.