இதற்காக, மத்திய அரசின் கதவையும் தட்டி வெளியில் கடனுதவி பெற அனுமதி கேட்டது. மத்திய அரசும் அதற்கு இசைவு தெரிவிதத்தை தொடர்ந்து, ஆசிய வளர்ச்சி வங்கி மூலம் அதற்கான நிதியை பெற முயற்சி எடுத்து வந்தது. அனைத்து கோப்பு நடைமுறைகளும் முடிந்த நிலையில் தற்போது ஆசிய வளர்ச்சி வங்கி புதுச்சேரி அரசுக்கு கடனுதவியாக 4,750 கோடி ரூபாய் வழங்கியுள்ளது.

இந்த நிதி இரண்டு தவணைகளில் புதுச்சேரி அரசுக்கு கிடைக்கும். 50 ஆண்டுகள் கழித்து இந்த கடனை புதுச்சேரி அரசு திருப்பி செலுத்த வேண்டும். வெளிச்சந்தையை ஒப்பிடும்போது வட்டி விகிதம் குறைவு. 3 சதவீதம் முதல் 4 சதவீத வரை மிக குறைந்த வட்டியில் இந்த நிதியுதவி ஆசிய வளர்ச்சி வங்கி புதுச்சேரிக்கு அளித்து உள்ளது. இந்த பணிகளை 5 ஆண்டிற்குள் நிறைவேற்ற வேண்டும்.

பொதுப்பணித் துறை லட்சுமிநாராயணன் முன்னிலையில் புதிய உட்கட்டமைப்பு திட்டங்கள் குறித்து முதல்வர் ரங்கசாமி கூறியதாவது:

இந்த நிதியில் புதுச்சேரியில் 25 பிரமாண்டமான பெரிய திட்டங்கள் மேற்கொள்ளப்பட உள்ளது. முக்கிய திட்டமாக கடல் நீரை குடிநீராக மாற்றும் திட்டம் அமைந்துள்ளது. இந்த திட்டத்தின் கீழ் இரண்டு 50 எம்.எல்.டி., கடல் நீர் சுத்திரிகரிப்பு நிலையங்கள் பிரமாண்டமாக 1000 கோடி ரூபாயில் ஏற்படுத்தப்பட உள்ளது. இது முதல் கட்ட திட்ட மதிப்பீட்டிலேயே முடிக்க முடிவு செய்யப்பட்டுள்ளது.

அடுத்து, பெரிய திட்டமாக சாத்தனுார் அணையில் இருந்து புதுச்சேரி அரசுக்கும், தமிழக அரசுக்கும் இடையே உள்ள ஒப்பந்தத்தின்படி 140 கி.மீ., தொலைவிற்கு குழாய் அமைத்து தண்ணீர் கொண்டு வரப்பட உள்ளது. இந்த திட்டத்திற்கு முதல் கட்ட மதிப்பு 350 கோடி ரூபாயிலும், இரண்டாம் கட்ட திட்டம் 325 கோடி ரூபாயிலும் அமைகிறது. இதேபோல், புதுச்சேரி பகுதிகளில் விடுபட்ட பாதாள சாக்கடை திட்டம் முதல் கட்டமாக 250 கோடி ரூபாயிலும், இரண்டாம் கட்டமாக 300 கோடி ரூபாயிலும் அமைக்க உத்தேசிக்கப்பட்டுள்ளது.

மரப்பாலத்தில் இருந்து அரியாங்குப்பம் சந்திப்பு வரை உயர்மட்ட மேம்பாலம் முதல் கட்டமாக 200 கோடி ரூபாயிலும், இரண்டாம் கட்டமாக 100 கோடி ரூபாய் என 300 கோடி ரூபாய் மதிப்பில் செயல்படுத்தப்பட உள்ளது. இவ்வாறு முதல்வர் ரங்கசாமி கூறினார்.

பேட்டியின்போது, சபாநாயகர் செல்வம் உடனிருந்தனர்.